សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ ស្ត្រីជនជាតិវៀតណាមម្នាក់ត្រូវបានសមត្ថកិច្ចនគរបាលស្រុកពញាឮបង្រ្កាបចាប់ខ្លួន កាលពីវេលាម៉ោង១១ និង៥០នាទី ថ្ងៃទី០៦ ខែមីនា ឆ្នាំ២០១៧ ត្រង់ចំណុចផ្ទះជួល ស្ថិតក្នុងភូមិពោធិតូច ឃុំកំពង់លួង ស្រុកពញាឮ ដកហូតបានវត្ថុតាងថ្នាំញៀនប្រភេទមេតំហ្វេតាមីនចំនួន០៨កញ្ចប់ ដើម្បីកសាងសំណុំរឿងចាត់ការតាមច្បាប់ ។
មន្ត្រីនគរបាលស្រុកពញាឮបានឲ្យដឹងថា ស្ត្រីជនជាតិវៀតណាម ដែលត្រូវបានចាប់ខ្លួននោះឈ្មោះ ង្វៀង ធីអ៊ុក ហៅអ៊ុក ភេទស្រី អាយុ៥២ឆ្នាំ ជនជាតិវៀតណាម មុខរបរ មិនពិតប្រាកដ បច្ចុប្បន្នស្នាក់នៅបណ្តោះអាសន្នផ្ទះជួល ស្ថិតក្នុងភូមិពោធិតូច ឃុំកំពង់លួង ស្រុកពញាឮ ។ ក្នុងប្រតិបត្តិការបង្រ្កាបចាប់ខ្លួនជនសង្ស័យខាងលើនេះ សមត្ថកិច្ចបានដកហូតវត្ថុតាងរួមមាន៖ ថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន០៨កញ្ចប់ ,ទូរស័ព្ទដៃ០១គ្រឿង ,សម្ភារៈវេចខ្ចប់ និងឧបករណ៍សម្រាប់សេពគ្រឿងញៀនមួយចំនួន ។
ប្រភពដដែលបានបន្តថា បន្ទាប់ពីទទួលព័ត៌មានពីមហាជនល្អថានៅក្នុងភូមិសាស្ត្រឃុំកំពង់លួង ស្រុកពញាឮ មានស្ត្រីជនជាតិវៀតណាមធ្វើសកម្មភាពជួញដូរគ្រឿងញៀនដោយខុសច្បាប់រួចមក សមត្ថកិច្ចនគរបាលស្រុកពញាឮបានចុះធ្វើការស្រាវជ្រាវ រហូតឈានដល់បង្រ្កាបចាប់ខ្លួនជនសង្ស័យរួមជាមួយវត្ថុតាង ដើម្បីកសាងសំណុំរឿងចាត់ការតាមច្បាប់ ៕ ស្អាងជ័យ
