សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀងៈ មានការភ្ញាក់ផ្អើលដល់អ្នកភូមិ ក៏ដូចជាអ្នកធ្វើដំណើរនាំគ្នាចោមរោមមើលយ៉ាងច្រើនកកកុញតាមផ្លូវ ខណៈដែលប្រទះឃើញបុរសចំណាស់ម្នាក់ បានស្លាប់ភ្លាមៗ បន្ទាប់ពីធ្លាក់ពីលើចុងត្នោត សង្ស័យងងឹតមុខកាលពីវេលាម៉ោង៤រសៀល ថ្ងៃទី៦ ខែមីនា ឆ្នាំ២០១៧ ស្ថិតក្នុងភូមិចុងព្រែកឃុំ មឺុនជ័យ ស្រុករំដួល ខេត្តស្វាយរៀង ។
យោងតាមសមត្ថកិច្ចនគរបាលស្រុកបានឲ្យដឹងថា បុរសដែលស្លាប់មានឈ្មោះ សេក ស៊ឹម អាយុ៦៣ឆ្នាំ មុខរបរកសិករ រស់នៅភូមិចុងព្រែក ឃុំមឺុនជ័យ ស្រុករំដួល ។
តាមអ្នកភូមិបានឲ្យដឹងថា ក្រុមគ្រួសារបុរសខាងលើមានជីវភាពខ្វះខាត រកមួយព្រឹក ហូបមួយព្រឹក ហើយមានការងារឡើងដាក់ទឹកត្នោតដើម្បីបានប្រាក់កម្រៃចិញ្ចឹមកូនៗ និងចៅៗបន្ថែមទៀត ។
ប្រភពបន្តថា មុនកើតហេតុ គេឃើញបុរសចំណាស់ខាងលើបានកាន់បំពង់ទឹកត្នោតឡើងយកទឹកដូចរាល់ដងប្រមាណជា១៥នាទី ស្រាប់តែមិនដឹងយ៉ាងម៉េច បុរសខាងលើបានធ្លាក់ពីលើចុងត្នោតដែលមានកម្ពស់ប្រមាណជិត១០ម៉ែត្រលាន់សូរក្ឌាំងបណ្ដាលឲ្យមានការភ្ញាក់ផ្អើលដល់អ្នកភូមិនិងក្រុមគ្រួសារនាំគ្នាជួយសងគ្រោះដែរ ប៉ុន្តែដោយរបួសធ្ងន់ពេកក៏ដាច់ខ្យល់តែម្ដង ។
សពត្រូវបានសមត្ថកិច្ចប្រគល់ទៅឲ្យក្រុមគ្រួសារយកធ្វើបុណ្យទាំងក្ដុកក្ដួលបំផុត ៕ យឹម សុថាន
