រថយន្តតាក់សុីម៉ែត្រក្រហមបត់មិនប្រយ័ត្នត្រូវម៉ូតូមួយគ្រឿងបុករងរបួសធ្ងន់មនុស្សម្នាក់

ភ្នំពេញ ៖ រថយន្តតាក់សុីម៉ែត្រមួយគ្រឿង បើកបត់ត្រឡប់ក្រោយមិនបានប្រយត្ន័ បណ្ដាលឲ្យម៉ូតូមួយគ្រឿងបើកបុកពីចំហៀង ម្ចាស់ម៉ូតូរងរបួសធ្ងន់ ហើយចំណែកឯរថយន្តវិញបានបើករត់គេចខ្លួនបាត់ស្រមោល ។ ហេតុការណ៍នេះ បានកើតឡើងកាលពីវេលាម៉ោង២២និង៣៧នាទី ថ្ងៃទី ៩ ខែមីនា ឆ្នាំ២០១៧ ត្រង់ចំណុចមុខសាលាបង្រៀនបើកបរមួយកន្លែង តាមបណ្ដោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញម៉ូតូរងគ្រោះមួយគ្រឿងម៉ាកនិច ពណ៌ស ពាក់ស្លាកលេខ ភ្នំពេញ 1DF5291 បើកបរដោយបុរសម្នាក់មិនស្គាល់អត្តសញ្ញាណ បើកក្នុងទិសដៅពីលិចទៅកើត ក្នុងល្បឿនលឿន លុះមកដល់ចំនុចកើតហេតុ ស្រាប់តែមានរថយន្តតាក់សុីម៉ែត្រមួយគ្រឿង ពណ៌ក្រហម មិនចាំស្លាកលេខ បើកក្នុងទិសដៅពីលិចទៅកើត ហើយបានបត់ត្រឡប់ក្រោយ មិនបានប្រយត្ន័ ម៉ូតូដែលមកពីក្រោយបណ្ដាលឲ្យម៉ូតូខាងលើបុកចំរថយន្តដែលបត់នោះចំ ចំហៀងខាងឆ្វេងពេញមួយទំហឹង បណ្ដាលអោយម្ចាស់ម៉ូតូរងរបួសធ្ងន់បាក់ភ្លៅខាងស្ដាំ និងបែកក្បាលហូរឈាមដាបពេញផ្លូវ ហើយភ្លាមៗនោះរថយន្តបានបើករត់គេចខ្លួនបាត់ស្រមោលនៅសល់តែជនរងគ្រោះនៅដេកននៀលលើផ្លូវ។

ក្រោយពេលកើតហេតុ សមត្ថកិច្ចមូលដ្ឋានបានចុះកដល់ចំណុចកើតហេតុហើយបានទាក់ទង ទៅកាន់រថយន្តសង្គ្រោះបន្ទាន់របស់គ្លីនិកឯកជនរស្មីមកដឹកជនរងគ្រោះយកទៅសង្គ្រោះ ចំណែកឯម៉ូតូជនរងគ្រោះត្រូវបានសមត្ថកិច្ចចរាចរណ៍ខណ្ឌសែនសុខយកទៅរក្សាទុកនៅអធិការដ្ឋានខណ្ឌសែនសុខរង់ចាំម្ចាស់មកទទួលយកទៅវិញ ៕ តុង សីហា