សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ នគរបាលស្រុកមង្គលបុរី ក្រោមការដឹកនាំកម្លាំងដោយលោកវរសេនីយ៍ទោ ស៊ី ឌី អធិការនគរបាលស្រុកមង្គលបុរី បានចុះទៅបិទទីតាំងហាងផឹកស៊ីមួយកន្លែងក្នុងស្រុកមង្គលបុរី ដែលសង្ស័យហាងផឹកស៊ីនោះ ផ្តល់ទីតាំងឱ្យសិស្សសាលាចូលទៅផឹកស៊ីហើយប្រើបាស់ថ្នាំញៀន ខុសច្បាប់ ។
ការចុះបិទទីតាំងហាងឈ្មោះតា តាប់ ស្ថិតនៅចំណុចព្រំប្រទល់រវាងសង្កាត់កោះពងសត្វក្រុងសិរីសោភ័ណ និងឃុំប្ញសសីក្រោក ស្រុកមង្គលបុរី ខេត្តបន្ទាយមានជ័យ នៅរសៀលថ្ងៃទី១៣ ខែមីនា ឆ្នាំ២០១៧ អនុវត្តតាមបញ្ជារបស់លោក តេង សម័យ ព្រះរាជអា ជ្ញារងអមសាលាដំបូងខេត្តបន្ទាយមានជ័យ ក្រោយពីកម្លាំងនគរបាលស្រុកមង្គលបុរី ក្រោមការអនុវត្តតាមបទបញ្ជាផ្ទាល់របស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានបញ្ជាឱ្យលោកអធិការនគរបាលស្រុកមង្គលបុរីដឹកនាំកម្លាំងចុះទៅបង្រ្កាបទីហាងផឹកស៊ី ខាងលើ ហើយឃាត់ខ្លួនសិស្សចំនួន១៣នាក់ ដែលមានការប្រើប្រាស់ថ្នាំញៀនទៅទីនោះតែម្តង ។ ទន្ទឹមនោះ កម្លាំងនគរបាលក៏បានឃាត់ខ្លួនម្ចាស់ហាងផឹកស៊ីនោះបានម្នាក់ មានឈ្មោះ មាស តាប់ ភេទប្រុស អាយុ៥៨ឆ្នាំ រស់នៅភូមិកោះកែវ ឃុំឫស្សីក្រោក ស្រុកមង្គលបុរី បញ្ជូនទៅកាន់ស្នងការដ្ឋាននគរបាលខេត្តដើម្បីយកទៅសាកសួរតាមនីតិវិធីរបស់សមត្ថកិច្ច។
លោកវរសេនីយ៍ទោ ស៊ី ឌី អធិការនគរបាលស្រុកមង្គលបុរីប្រាប់ឱ្យដឹងថា កាលពីថ្ងៃទី១១ ខែមីនា ឆ្នាំ២០១៧ កម្លាំងនគរបាលស្រុកមង្គលបុរី ក្រោយពីទទួលព័ត៌មានរបស់អាណាព្យាបាលសិស្សមកថា កូនរបស់ពួកគាត់បានគេចពីសាលា មិនចូលរៀនហើយនាំគ្នាទៅប្រើប្រាស់គ្រឿងញៀននៅចំណុចហាងខាងលើរួចហើយ ។ លោកក៏បានសុំគោលការណ៍ពីលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងមានការសម្របសម្រួលពីលោក តេង សម័យ ព្រះរាជងអាជ្ញារងអមសាលាដំបូងខេត្តបន្ទាយមានជ័យ លោកឧត្តមសេនីយ៍ស្នងការ ក៏បញ្ជារូបលោកផ្ទាល់ដឹកនាំកម្លាំងចុះទៅបង្រ្កាបទីតាំងហាងនោះ ដោយឃាត់ខ្លួនក្មេងសិស្សសាលា១៣នាក់។ នៅក្នុងខ្យូសផឹកស៊ី ពិនិត្យឃើញ មានសំបកកូនថង់វេចខ្ចប់គ្រឿងញៀនមួយចំនួនធំ។
លោកអធិការបានប្រាប់ឱ្យដឹងទៀតថា សិស្សទាំង១៣នាក់ខាងលើរៀននៅវិទ្យាល័យស្រុកមង្គលបុរី ចាប់ពីថ្នាក់ទី៧ រហូតដល់ថ្នាក់ទី១២ សមត្ថកិច្ចពិនិត្យ និងធ្វើតេស្តទឹកនោមទៅលើសិស្សទាំងនោះមានផ្ទុកសារធាតុញៀននៅក្នុងខ្លួន ។ កម្លាំងនគរបាលក៏ចាប់បញ្ជូនយកទៅចាត់ការតាមនីតិវីធី ។
លោកវរសេនីយ៍ទោ ស៊ី ឌីអធិការនគរបាលស្រុកមង្គលបុរីបញ្ជាក់ឱ្យដឹងទៀតថា ហាងឈ្មោះ តា តាប់ ខាងលើ ជាកន្លែងប្រមូលផ្តុំសិស្សសាលាគេចមិនចូលរៀន ហើយមានសិស្សប្រុស ស្រី ពពាក់ពពូនមកផឹកស៊ីសប្បាយ នៅទីនេះជារៀងរាល់ថ្ងៃ និងមានការប្រើប្រាស់ថ្នាំញៀនផងដែរ ។
សូមបញ្ជាក់ថា នៅស្រុកមង្គលបុរីនោះដែរ កាលពីថ្ងៃចុងសប្តាហ៍កន្លងទៅនេះ កម្លាំងនគរបាលស្រុកង្គលបុរី ក៏បានចុះទៅបង្រ្កាបឃាត់ខ្លួនជនសង្ស័យមុខសញ្ញាជួញដូរថ្នាំញៀន២នាក់ ស្ថិតនៅចំណុចភូមិបួរ ឃុំសឿ ស្រុកមង្គលបុរី និងឆែកឆេរដកហូតបានថ្នាំញៀនមេតំហ្វេតាមីនទឹកកចំនួន ១០កូនថង់ ជនសង្ស័យទាំង២នាក់ ត្រូវបានសមត្ថកិច្ចចាប់បញ្ជូនយកទៅតុលាការចាត់ការតាមផ្លូវច្បាប់នោះហើយ ៕ សំ វិច្ឆិកា
