សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ កម្លាំងកងរាជអាវុធហត្ថក្រុងសៀមរាប១២នាក់ រថយន្ត១គ្រឿង ម៉ូតូ៤គ្រឿង ដឹកនាំកម្លាំងដោយលោកវរសេនីយ៍ទោ ប្រាក់ វណ្ណៈ មេបញ្ជាការកងរាជអាវុធហត្ថក្រុង បានចុះបង្រ្កាបករណីលក់ចែកចាយសារធាតុញៀន រហូតឈានដល់ឃាត់ខ្លួនបានជនសង្ស័យម្នាក់ រួចបញ្ជូនមកសួរនាំ និងរៀបចំសំណុំរឿងបញ្ជូនទៅការិយាល័យប្រឆាំងគ្រឿងញៀន ។ ហេតុការណ៍នេះបានធ្វើឡើងថ្ងៃទី១៨ ខែមីនា ឆ្នាំ២០១៧ ស្ថិតនៅចំណុច ភូមិវត្តបូព៍ សង្កាត់សាលាកំរើក ក្រុងសៀមរាប ខេត្តសៀមរាប។
លោកវរសេនីយ៍ទោ ប្រាក់ វណ្ណៈ មេបញ្ជាការកងរាជអាវុធហត្ថក្រុង បានប្រាប់ថា ក្រោយពីទទួលបានបទបញ្ជាពីលោកមេបញ្ជាការកងរាជអាវុធហត្ថ ខេត្តសៀមរាបកម្លាំងក្រុងសៀមរាប សមត្ថកិច្ចបានបង្រ្កាបករណីចែកចាយសាធាតុញៀននៅចំណុច ខាងលើ រហូតចាប់បានជនសង្ស័យម្នាក់ឈ្មោះ សួន និស្ស័យ ភេទប្រុស អាយុ៣២ឆ្នាំ មានទីលំនៅភូមិវត្តបូព៍ សង្កាត់សាលាកំរើក ក្រុងសៀមរាប ខេត្តសៀមរាប ។
ប្រភពបន្តថា ព្រមជាមួយនេះ ដកហូតវត្ថុតាងរួមមាន ម្សៅគ្រឿមពណ៌សថ្លា (ម៉ាទឹកកក)ចំនួន៣កញ្ចប់, ម្សៅចំរាញ់១កញ្ចប់, WY១គ្រាប់កន្លះ, ជញ្ជីងថ្លឹង១, ទូរស័ព្ទ៣គ្រឿង, កុំព្យូទ័រ១គ្រឿង, សម្ភារៈវេចខ្ចប់មួយចំនួន, ចង្រ្កានហ្គាស និងចានសម្រាប់ចំរាញ់កាកសំណល់១។
បច្ចុប្បន្ន ជនសង្ស័យនិងវត្ថុតាង ត្រូវបានកម្លាំងការិយាល័យប្រឆាំងគ្រឿងញៀន នៃកងរាជអាវុធហត្ថខេត្តកំពុងរៀបចំសំណុំរឿងបញ្ជូនទៅតុលាការខេត្ត ដើម្បីចាត់ការតាមច្បាប់ ៕ ប៊ុន រិទ្ធី
