សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ មានករណីគ្រោះថ្នាក់ចរាចរណ៍មួយបានកើតឡើងនៅលើកំណាត់ផ្លូវជាតិលេខ៤ ចន្លោះគីឡូម៉ែត្រ៧៥-៧៦ រវាងរថយន្ត នឹងរថយន្តបណ្តាលឲ្យប្តីប្រពន្ធ២នាក់រងរបួស។
ករណីគ្រោះថ្នាក់ចរាចរណ៍៍បានកើតឡើងនៅវេលាម៉ោង១០ និង៣០នាទីព្រឹកថ្ងៃទី៦ ខែកក្កដា ឆ្នាំ២០១៧ នៅភូមិចេក ឃុំអូរ ស្រុយកភ្នំស្រួច ខេត្តកំពង់ស្ពឺ។
មន្ត្រីនគរបាលស្រុកភ្នំស្រួចបានឲ្យដឹងថា រថយន្តដែលបុកគ្នាខាងលើនេះមួយគ្រឿងម៉ាកកាមរីឆ្លាម ពណ៌ឆ្លូញ ពាក់ស្លាកលេខ ភ្នំពេញ 2J-9613 បើកបរដើយឈ្មោះ មុំ ថុន អាយុ៦១ឆ្នាំ ក្នុងនោះមានប្រពន្ធរួមដំណើរជាមួយឈ្មោះ លី មួយ អាយុ៥៥ឆ្នាំ បច្ចុប្បន្នជនរងគ្រោះទាំង២នាក់រស់នៅភូមិទី២ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ ចំណែករថយន្តមួយគ្រឿងទៀតម៉ាក ហ្វុយហ្សូ ពណ៌បៃតង ពាក់ស្លាកលេខ តាកែវ 3A-1481 មានសណ្តោងរុឺម៉ក ហើយក្រោយពីកើតហេតុ អ្នកបើកបររថយន្តនេះបានរត់ចោលរថយន្ត។
តាមសាក្សីបានប្រាប់សមត្ថកិច្ចថា នៅមុនពេលកើតហេតុ រថយន្តកាមរីឆ្លាម បានធ្វើដំណើរពីកើតទៅលិចុ។ លុះមកដល់ចំណុចកើតហេតុបានបុកជាមួយរថយន្តហ្វុយហ្សូក្នុងទិសដៅបញ្ច្រាសគ្នា ហើយបណ្តាលឲ្យរថយន្តហ្វុយហ្សូធ្លាក់ពីផ្លូវភ្អៀងកន្ទុយក្រោយក្បែរនឹងក្រឡាប់ទៀតផង។
បច្ចុប្បន្នប្តីប្រពន្ធដែលរងរបួសស្រាលត្រូវបានបញ្ជូនទៅព្យាបាលរបួសនៅគ្លីនិកឯកជនមួយក្នុងខេត្តកំពង់ស្ពឺគ្រាដែលសមត្ថកិច្ចបានចុះវាស់វែងនៅចំណុចកើតហេតុ រួចយករថយន្តទាំង២គ្រឿទៅរក្សាទុកនៅអធិការដ្ឋាននគរបាលស្រុកភ្នំស្រួចដើម្បីដោះស្រាយជាក្រោយ៕ សេនា ស័ក្តិ
