សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ រថយន្តមិនស្គាល់ម៉ាកបើកបោះពួយយ៉ាងលឿនជ្រុលទៅបុកម៉ូតូមួយគ្រឿងពេញមួយទំហឹង បណ្តាលឲ្យបុរស២នាក់ស្លាប់យ៉ាងអណោចអធ័ម កាលពីវេលាម៉ោង២ និង១០នាទី ទាបភ្លឺថ្ងៃទី១៧ ខែកក្កដា ឆ្នាំ២០១៧ នៅលើផ្លូវជាតិលេខ៦ ត្រង់ចំណុចចន្លោះគីឡូម៉ែត្រលេខ២៩-៣០ ស្ថិតក្នុងភូមិឫស្សីជ្រោយ ឃុំឫស្សីជ្រោយ ស្រុកមុខកំពូល ។
មន្ត្រីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះ២នាក់ស្លាប់បាត់បង់ជីវិតនោះ ទី១-ឈ្មោះ ពឿន ហ៊ី ភេទប្រុស អាយុ២៦ឆ្នាំ (ជាអ្នកបើកបរម៉ូតូ) ទី២-ឈ្មោះ ស៊ីម សៀន ភេទប្រុស អាយុ២៤ឆ្នាំ ។ ជនរងគ្រោះទាំង២នាក់មានទីលំនៅភូមិភ្នំតូច ឃុំត្រប់ ស្រុកបាធាយ ខេត្តកំពង់ចាម ជិះម៉ូតូម៉ាកស៊ុយហ្ស៊ូគីស្មាស់ ពណ៌ខៀវ ពាក់ស្លាកលេខភ្នំពេញ1O-2475 ។ ចំណែកឯរថយន្តមិនស្គាល់ម៉ាក ក្រោយពីបើកបុកមនុស្សស្លាប់បានបើកគេចខ្លួនបាត់ស្រមោល ។
ប្រភពដដែលបានបន្តថា នៅមុនពេលកើតហេតុសាក្សីបានឃើញជនរងគ្រោះជិះម៉ូតូឌុបគ្នាតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូងដោយល្បឿនលឿន ។ លុះជិះដល់ចំណុចកើតហេតុក៏ត្រូវរថយន្តមិនស្គាល់ម៉ាកបើកបុកពីក្រោយពេញមួយទំហឹង បណ្តាលឲ្យម៉ូតូដួលបោកជនរងគ្រោះទាំង២នាក់ទៅលើផ្លូវស្លាប់យ៉ាងអណោចអធ័ម ។ ក្រោយពីមានហេតុការណ៍កើតឡើង រថយន្តមិនស្គាល់ម៉ាកបានបើកគេចខ្លួនបាត់ស្រមោល ។ ដោយឡែកសាកសពជនរងគ្រោះទាំង២នាក់ ត្រូវបានសមត្ថកិច្ចនគរបាលចរាចរណ៍ ស្រុកមុខកំពូលប្រគល់ទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី ។ ចំណែកឯម៉ូតូត្រូវបានបញ្ជូនទៅរក្សាទុកនៅប៉ុស្តិ៍នគរបាលរដ្ឋបាលឫស្សីជ្រោយ ដើម្បីចាត់ការតាមច្បាប់ ៕ ស្អាងជ័យ
