សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មនុស្ស៤នាក់ត្រូវប៉ូលីសនគរបាលប៉ុស្តិ៍ទឹកថ្លាឃាត់ខ្លួនយកមកសាកសួរ ក្រោយពីពួកគេជិះម៉ូតូ១គ្រឿងអត់ស្លាលេខឌុបគ្នាហើយនៅពេលឃាត់ឆែកឆេររកឃើញមានដែកចុងស្រួចសម្រាប់ប្រព្រឹត្តបទល្មើសជាប់ខ្លួនថែមទៀត។
ករណីឃាត់ខ្លួនជនទាំង៤នេះ ធ្វើឡើងកាលពីម៉ោង១៦ ថ្ងៃទី២៥ ខែកក្កដា ឆ្នាំ២០១៧ នៅផ្លូវ២៧១ ភូមិត្រពាំងឈូក សង្កាត់ទឹកថ្លាខណ្ឌសែនសុខ។
ប៉ូលីសនិយាយថា ជនសង្ស័យទាំង៤នាក់នេះ ទី១ឈ្មោះ សឿន គឹមស៊ិន អាយុ៣១ឆ្នាំ មុខរបរជាងពិដាន ស្នាក់នៅភូមិសាមគ្គី សង្កាត់ឫស្សីកែវ ខណ្ឌឫស្សីកែវ ទី២ឈ្មោះ ចិត ចិនរ៉ាស៊ី អាយុ២៩ឆ្នាំ មុខរបរជាងពិដាន ស្នាក់នៅភូមិសាមគ្គី សង្កាត់ឫស្សីកែវ ខណ្ឌឫស្សីកែវ ទី៣ឈ្មោះ វ៉ែន សុធី អាយុ២៩ឆ្នាំ មុខរបរកម្មករ ស្នាក់នៅភូមិសាមគ្គី សង្កាត់ឫស្សីកែវ ខណ្ឌឫស្សីកែវ និងទី៤ឈ្មោះផាច់ វាសនា អាយុ២៥ឆ្នាំ មុខរបរកម្មករ ស្នាក់នៅភូមិសាមគ្គី សង្កាត់ឫស្សីកែវ ខណ្ឌឫស្សីកែវ។
សមត្ថកិច្ចប្រាប់ថា មុនឃាត់ខ្លួនជនសង្ស័យខាងលើ ខណៈកម្លាំងសមត្ថកិច្ចល្បាតក្នុងមូលដ្ឋានបានឃើញក្រុមខាងលើជិះម៉ូតូមួយគ្រឿងម៉ាកឃ្លីក ពណ៌ស អត់មានស្លាកលេខឌុបគ្នាដោយសង្ស័យ ក៍ហៅឲ្យឈប់ និងនាំមកកាន់ប៉ុស្តិ៍នគរបាលរដ្ឋបាលទឹកថ្លាដើម្បីត្រួតពិនិត្យ និងឆែកឆេរទៅលើខ្លួនជនសង្ស័យខាងលើ ស្រាប់តែឃើញមានដែកចុងស្រួចសម្រាប់ប្រព្រឹត្តបទល្មើសជាប់ខ្លួនផងក៏ឃាត់សាកសួរតែម្តង។
សមត្ថកិច្ចបានបញ្ជាក់ប្រាប់ថា ក្រោយពីឃាត់ខ្លួនយកមកប៉ុស្តិ៍បានធ្វើតេស្តិ៍ទឹកនោមរកសារធាតុញៀនឃើញថា ជនសង្ស័យទាំង៤មានផ្ទុកនូវសារធាតុញៀនទើបឃាត់ខ្លួនទាំងអស់តែម្តងនិងខបញ្ជួនទៅអធិការដ្ឋាននគរបាលខណ្ឌសែនសុខចាត់ការបន្ត៕ តុង សីហា
