បុរសម្នាក់ឡើងផ្សាស្លាកយីហោយានដ្ឋានត្រូវចរន្តអគ្គីសនីឆក់ដួលដេកលើដំបូលស័ង្កសីរបួសធ្ងន់

ភ្នំពេញ៖ បុរសម្នាក់ដែលជាជាងផ្សាដែកខណៈឡើងទៅផ្សាតម្លើងស្លាកយីហោយានដ្ឋាននិងកន្លែងលាងរថយន្តត្រូវបានចរន្តអគ្គីសនីឆក់បណ្ដាលឲ្យដួលលើដំបូលសូង្កសីរងរបួសយ៉ាងធ្ងន់ធ្ងរ និងត្រូវបានគេបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗដែរប៉ុន្តែមិនទាន់ដឹងថាគាត់គេចផុតពីសេចក្ដីស្លាប់ឬអត់នោះឡើយ។

ហេតុការណ៍នោះបង្កឲ្យមានការភ្ញាក់ផ្អើលឡើង កាលពីវេលាម៉ោង៤និង១៥នាទីល្ងាច ថ្ងៃទី៤ ខែសីហា ឆ្នាំ២០១៧ នៅក្នុងយានដ្ឋានជួសជុលរថយន្តនិងលាងរថយន្តយីហោ《មជ្ឈមណ្ឌលថែទាំយានយន្តVSស្អាតល្អ》ដែលមាទីតាំងស្ថិតនៅតាមបណ្ដោយផ្លូវវ៉េងស្រេង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានបានឲ្យដឹងថា បុរសរងគ្រោះខាងលើនោះមិនត្រូវបានគេស្គាល់អត្តសញ្ញាណនោះទេ ហើយមានទីលំនៅ នៅឯណានោះឡើយ គាត់មានអាយុប្រហែល៣៥ឆ្នាំ បានរងរបួសធ្ងន់ធ្ងរបំផុត ហើយនៅមុនពេលកើតហេតុគាត់បានឡើងទៅលើដំបូលយានដ្ឋាននោះ ដើម្បីផ្សាតម្លើងស្លាកយីហោថ្មី។ពេលនោះក៏ត្រូវបានចរន្តអគ្គីសនីឆក់ បណ្ដាលឲ្យដួលដេកនៅលើដំបូលដែកស័ង្កសីបង្កឲ្យមានការភ្ញាក់ផ្អើលយ៉ាងខ្លាំង ហើយអ្នកនៅជិតនោះបាននាំគ្នាបិទបារ៉ែតភ្លើងនិងហៅរថយន្តពេទ្យទៅកាន់ទីនោះដឹកទៅសង្គ្រោះភ្លាមៗ។

ប្រភពខាងលើបានបង្ហើបទៀតថា អាគារយានដ្ឋាននោះសាងសង់ពីដែកទាំងគ្រោងនិងដំបូលហើយការឆក់បណ្ដាលឲ្យរងរបួសនេះសង្ស័យ បណ្ដាលមកពីការធ្វេសប្រហែស ហើយខ្សែភ្លើងមានមុខតំណរប៉ះជាមួយដែកអាគារយានដ្ឋាននេះ ទើបឆ្លងចរន្តបណ្ដាលឲ្យឆក់បែបនេះតែម្ដង ហើយអ្នកជិតខាងបាននាំគ្នាដាក់ជណ្ដើរឡើងទៅដាក់ជនរគ្រោះចុះក្រោមរួចដឹកយកទៅសង្គ្រោះ៕ សុខាសែនជ័យ