សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ ក្នុងចំណោមបក្ខពួក៦នាក់ ត្រូវបានសន្តិសុខឃាត់ប្រគល់ឲ្យសមត្ថកិច្ច បន្ទាប់ពីពួកគេចូលធ្វើសកម្មភាពកាត់បង្អួចចូលលួចខោអាវរោងចក្រ កាលពីវេលាម៉ោងរំលងអធ្រាត្រ ឈានចូលថ្ងៃទី៥ ខែសីហា ឆ្នាំ២០១៧ នៅរោងចក្រមួយកន្លែង ភូមិកប់គង សង្កាត់ចោមចៅ ខណ្ឌពោធិ៍សែនជ័យ។
ជនសង្ស័យដែលឃាត់ខ្លួនឈ្មោះ ងួត សារ៉ុម ភេទប្រុស អាយុ៣២ឆ្នាំ មុខរបកម្មករសំណង់ ស្នាក់បន្ទប់ជួល សង្កាត់កំបូល ខណ្ឌពោធិ៍សែនជ័យ មានស្រុកកំណើតនៅភូមិរលួស ឃុំរលួស ខណ្ឌដង្កោ រាជធានីភ្នំពេញ ។ ចំណែកបក្ខពួក៥នាក់ទៀតរត់គេចខ្លួនបាត់។
តាមសាក្សីបានឲ្យដឹងថា នៅមុនពេលកើតហេតុជនសង្ស័យមានគ្នា៦នាក់ បានលួចចូលកាត់បង្អួចចូលក្នុងរោងចក្រ ដោយបក្ខពួក២នាក់ចូលខាងក្នុង និង៤នាក់ទៀតនៅចាំផ្លូវខាងក្រៅ។ ខណៈកំពុងប្រមូលខោអាវ ស្រាប់តែសន្តិសុខដែលយាមខាងក្នុងមកទាន់ ក៏ចាប់បានម្នាក់ ចំណែកបក្ខពួក៥នាក់ទៀតដឹងខ្លួនក៏រត់គេចខ្លួនបាត់។
លុះព្រឹកឡើង ក៏រាយការណ៍ទៅសមត្ថកិច្ចនាំខ្លួនយកទៅសាកសួនៅប៉ុស្តិ៍ចោមចៅ៕ សុខាសែនជ័យ
