សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ កុមារម្នាក់បានដើរលេងខាងក្រោយផ្ទះធ្លាក់ចូលទឹកស្រះលង់ស្លាប់ ខណៈដែលឪពុកម្តាយមានការធ្វេសប្រហែសមិនបានចាប់អារម្មណ៍ធ្វើការងារនៅក្នុងផ្ទះ។ហេតុការណ៍កើតឡើងកាលពីវេលាម៉ោង៤និង១៥នាទីល្ងាចថ្ងៃទី១៤ ខែសីហា ឆ្នាំ២០១៧ ស្ថិតនៅភូមិកាឡោមភ្លុក ឃុំព្រៃស្វាយ ស្រុកមោងប្ញស្សី ខេត្តបាត់ដំបង។
បើតាមប្រភពព័ត៌មាននៅកន្លែងកើតហេតុឲ្យដឹងថា មុនពេលកើតហេតុកុមាររងគ្រោះមានឈ្មោះ ភ័ក្រ្ត សុថេត ភេទប្រុស អាយុ៣ឆ្នាំ បានដើរលេងនៅក្នុងជុំវិញបរិវេណផ្ទះ ដោយឪពុកម្តាយភ្លេចចាប់អារម្មណ៍មិនបានមើលកូនមួយភ្លែត កុមាររងគ្រោះក៏ដើរទៅខាងក្រោយផ្ទះ ធ្លាក់ចូលទឹកស្រះលង់ស្លាប់។បន្ទាប់ម្តាយក៏បាត់កូនហើយក៏ដើររក ក៏ស្រាប់តែប្រទះឃើញកូនប្រុសនោះនៅក្នុងស្រះទឹក ហើយក៏ស្រែកឆោឡោឲ្យអ្នកភូមិជួយ។នៅពេលអ្នកភូមិនាំគ្នាមកចុះទៅស្រង់ក្មេងរងគ្រោះនៅក្នុងស្រះ កុមារនោះបានដាច់ខ្យល់ស្លាប់បាត់ទៅហើយ។
ក្រោយពីមានហេតុការណ៍នោះហើយកម្លាំងនគរបាលប៉ុស្ថិ៍ ក៏បានចុះទៅត្រួតពិនិត្យសពពិនិត្យឃើញថាកុមារឈ្មោះ ភ័ក្រ្ត សុថេត ពិតជាស្លាប់ដោយលង់ទឹកស្រះ។
សាកសពក្មេងរងគ្រោះ ក៏ត្រូវបានឪពុកម្តាយរៀបចំចាត់ចែងធ្វើបុណ្យតាមប្រពៃណី៕សំ វិច្ឆិកា
