សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ខឹងជេរប្រមាថគ្នាតាមឆាតហ្វេសប៊ុកដល់ពេលជិះម៉ូតូឃើញមុខស្រដៀងនៅក្នុងហ្វេសប៊ុកបាន ហូតខ្សែក្រវាត់វាយរយះក្បាលទើបដឹងថា ច្រឡំ សងប្រាក់ចំនួន២០០ដុល្លារបញ្ចប់រឿង កាលពីវេលាម៉ោង៥និង៣០នាទីល្ងាច ថ្ងៃទី១៧ ខែសីហា ឆ្នាំ២០១៧ នៅមុខកងពលតូចលេខ៧០ តាមបណ្តោយផ្លូវជាតិលេខ៣ ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះមានឈ្មោះ សុខ សីម៉ា ភេទប្រុស អាយុ២០ឆ្នាំ មុខរបរកម្មកររោងចក្រ រស់នៅភូមិអង្គត្រគៀត សង្កាត់កន្ទោក ខណ្ឌពោធិ៍សែនជ័យ របួសរយះក្បាល និងម្នាក់ទៀតឈ្មោះ សួន សីហា ភេទប្រុស អាយុ១៧ឆ្នាំ មុខរបរសិស្ស រស់នៅភូមិទួលកី សង្កាត់ភ្លើងឆេះរទះ ខណ្ឌពោធិ៍សែនជ័យ មិនមានរងរបួសទេ ។
ចំណែកជនបង្កទី១-ឈ្មោះ វី ជីហាក់ អាយុ១៦ឆ្នាំ មុខរបរសិស្ស រស់នៅភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ ជាអ្នកវាយ និងឈ្មោះ ចិន ពិទូរ ភេទប្រុស អាយុ១៧ឆ្នាំ មុខរបរសិស្ស រស់នៅបុរីសន្តិភាព២ ភូមិដំណាក់ត្រយឹង សង្កាត់ពងទឹក ខណ្ឌដង្កោ ។
តាមប្រភពព័ត៌មានពីជនរងគ្រោះបាននិយាយថា មុនពេលកើតហេតុពួកគាត់កំពង់តែជិះម៉ូតូមួយគ្រឿងម៉ាកនិច ពណ៌ទឹកក្រូចលាយស តាមបណ្តោយផ្លូវជាតិលេខ៣ មានគ្នា២នាក់បន្ទាប់មកឃើញជនបង្កជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ មិនចាំស្លាកលេខ មានគ្នា៣នាក់ លុះបើកមកដល់ចំណុចកើតហេតុស្រាប់តែជបង្កឈ្មោះ ជី ហាក់ បានយកខ្សែក្រវ៉ាត់វាយទៅលើជនរងគ្រោះឈ្មោះ សុខ សីម៉ា ដែលអង្គុយក្រោយគេបណ្តាលឱ្យរយះក្បាលផ្នែកខាងឆ្វេង ហើយភាគីបង្កខាងលើបានបើករត់គេចខ្លួនបាត់ ។ ភ្លាមៗនោះជនរងគ្រោះបានជិះតាមរកមើលជនបង្កបានប្រទះឃើញជនបង្ក២នាក់កំពុងតែអង្គុយនៅម្តុំផ្សារឯករាជ្យ ទើបជនរងគ្រោះបានរត់ទៅប្តឹងសមត្ថកិច្ចឱ្យឃាត់ជនបង្កយកមកសួរនាំនៅប៉ុស្តិ៍ចោមចៅ ។
តាមការសាកសួរពីសមត្ថកិច្ចជនបង្កឈ្មោះ វី ជីហាក់ បានសារភាពថា ខ្លួនពិតជាអ្នកវាយខាងជនរងគ្រោះពិតមែន ដោយវាយច្រឡំ ឃើញជនរងគ្រោះមុខស្រដៀងនឹងបុរសម្នាក់ដែលឈ្លោះប្រកែកជេរប្រមាថគ្នាទៅវិញទៅមកតាមរយៈឆាតលេងហ្វេសប៊ុក ទើបគេវាយបែបនេះ ។ ក្រោយពេលកើតហេតុខាងភាគីរងគ្រោះបានទាមទាសំណងចំនួន២.០០០ដុល្លារ តែក្រោយមកខាងតំណាងខាងជនបង្កសុំសម្រួលត្រឹម២០០ដុល្លារបញ្ចប់នៅប៉ុសិ៍្តនគរបាលចោមចៅ ៕ សុខាសែនជ័យ
