សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជនជាតិកូរ៉េម្នាក់ បើករថយន្ត Highlander បុករថយន្ត PRIUS ពេញទំហឹង ដោយសារតែបើកប៉ះគ្នាបន្តិចបន្តួចសោះបែរទៅជារឿងធំ ។
ហេតុការណ៍គ្រោះថ្នាក់ចរាចរណ៌ខាងលើនេះ កើតហេតុនៅវេលាម៉ោង៧និង៣០នាទីព្រឹក ថ្ងៃទី១៨ ខែសីហា ឆ្នាំ២០១៧ នៅត្រង់ចំណុចនៅមុខហាង BURGER KING បរិវេណស្ថានីយប្រេងឥន្ធនៈសូគីម៊ិច ផ្លូវលេខ៥៩២ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុនោះរថយន្តទាំងពីរ គឺបានប៉ះបន្តិចបន្តួច រួចរថយន្តទាំងពីរ ក៏ខុសផ្លូវគ្នាគឺរថយន្ត PRIUS បើកបរតាមផ្លូវលេខ៦០៨ ចំណែករថយន្តHighlander ស្រាប់តែមកដល់កន្លែងកើតហេតុខាងលើបុរសជនជាតិកូរ៉េបានបើករថយន្តមកនៅពីមុខរថយន្តម្ខាងទៀតមិនដឹងថា យ៉ាងម៉េច ស្រាប់តែបុរសជនជាតិកូរ៉េ បើករថយន្តមកបុកចំពីមុខរថយន្តមួយគ្រឿងទៀតបណ្ដាលឲ្យគៀបជាប់គ្នាតែម្ដង ។
បើតាមសំដីរបស់អ្នកបើកបររថយន្តPRIUSបានឲ្យដឹងថា ពេលប៉ះគ្នានោះគាត់បម្រុងឈប់នឹងកន្លែងហើយ តែដោយសារតែឃើញសភាពរបស់ជនជាតិកូរ៉េបែបនោះគាត់ក៏បានបើករថយន្តមករកកន្លែងដែលមានមនុស្សច្រើនទើបឈប់ មកដល់កើតហេតុខាងលើ គាត់បានឈប់រថយន្តហើយស្រាប់តែបុរសជនជាតិកូរ៉េបើកមកបុករថយន្តគាត់តែម្ដង ។
ក្រោយពេលកើតហេតុរថយន្តទាំងពីរត្រូវសមត្ថកិច្ចយកមករក្សាទុកនៅអធិការដ្ឋានខណ្ឌទួលគោកដើម្បីដោះស្រាយគ្នា ៕ ស ដារ៉ា
