សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ រថយន្តធុនធំរបស់អង្គភាពកងពលតូចលេខង៧០ បើកបោះពួយយ៉ាងលឿនពេលមេឃកំពុងធ្លាក់ភ្លៀង បណ្តាលឲ្យជាន់ហ្វ្រាំងមិនជាប់ជ្រុលទៅបុកគូថរថយន្តស៊េរីទំនើបម៉ាកAUDI Q7 ពេញមួយទំហឹងរងការខូចខាតយ៉ាងធ្ងន់ធ្ងរ តែសំណាងល្អមិនមានមនុស្សរងរបួស ។
ករណីគ្រោះថ្នាក់ចរាចរណ៍នេះបានកើតឡើង កាលពីវេលាម៉ោង១៥ និង៣៥នាទី ថ្ងៃទី២៤ ខែសីហា ឆ្នាំ២០១៧ នៅលើកំណាត់ផ្លូវជាតិលេខ៥ ត្រង់ចំណុចចន្លោះគីឡូម៉ែត្រលេខ៣៧-៣៨ ស្ថិតក្នុងចេតីយ៍ទ្រេត ឃុំវិហារហ្លួង ស្រុកពញាឮ ។
មន្ត្រីនគរបាលចរាចរណ៍ស្រុកពញាឮបានឲ្យដឹងថា រថយន្តបង្កម៉ាកGMC ពណ៌ត្រេអ៊ី ពាក់ស្លាកលេខ ខេមរៈភូមិន្ទ2.3-7054 បើកបរដោយឈ្មោះ អ៊ឹម សិរី ភេទប្រុស អាយុ៣៣ឆ្នាំ ជនជាតិខ្មែរ មុខរបរ ជាមន្ត្រីយោធាបម្រើការងារនៅអង្គភាពកងពលតូចលេខង70 ។ ចំណែកឯរថយន្តAUDI Q7 ពណ៌ស ពាក់ស្លាកលេខ ភ្នំពេញ2AH-3369 បើកបរដោយឈ្មោះ ជា សុខចាន់ ភេទប្រុស អាយុ៣៣ឆ្នាំ ជនជាតិខ្មែរ មានទីលំនៅផ្ទះលេខ៨២ ផ្លូវទន្លេសាប សង្កាត់ជ្រោយចង្វារ ខណ្ឌជ្រោយចង្វារ ក្រុងភ្នំពេញ ។
តាមការបំភ្លឺពីម្ចាស់រថយន្តAUDI Q7 បានឲ្យដឹងថា នៅមុនពេលកើតហេតុរូបគាត់បានបើករថយន្តតាមបណ្តោយផ្លូវជាតិលេខ៥ ក្នុងទិសដៅពីខេត្តបាត់ដំបង់ឆ្ពោះទៅរាជធានីភ្នំពេញវិញ ខណៈបើកដល់ចំណុចកើតហេតុមេឃងងឹតធ្លាក់ភ្លៀងខ្លាំង ហើយលំហូរចរាចរណ៍ក៏មានការកកស្ទះ ទើបរូបគាត់ជាន់ហ្វ្រាំងបន្ថយល្បឿន។គ្រានោះស្រាប់តែមានរថយន្តរបស់អង្គភាពយោធា បើកមកបុកគូថរថយន្តគាត់ពេញមួយទំហឹងតែម្តង ។ ម្ចាស់រថយន្តបានបញ្ជាក់ថា ករណីនេះមិនបានបណ្តាលឲ្យរូបលោករងរបួសឡើយ គ្រាន់តែខូចខាតរថយន្តមួយកំណាត់ក្រោយប៉ុណ្ណោះ ។
អធិការនគរបាលស្រុកពញាឮលោក ដួង តេង បានបញ្ជាក់ថា ករណីនេះភាគីរថយន្តអង្គភាពកងពលតូចលេខង70 បានទទួលស្គាល់កំហុសរបស់ខ្លួន ដោយអះអាងថា បណ្តាលមកពីរថយន្តជាន់ហ្វ្រាំងមិនស៊ី ទើបជ្រុលទៅបុកគូថរថយន្តAUDI យ៉ាងដូច្នេះ ។ លោក ដួង តេង បានបញ្ជាក់ថា អង្គភាពកងពលតូចលេខង70 បានយល់ព្រមសងសំណងទៅភាគីរថយន្តAUDI តែមិនដឹងថា ទំហំនៃការសងសំណងប៉ុណ្ណានោះទេ ខណៈដែលម្ចាស់រថយន្តAUDI Q7 អះអាងថា គ្រាន់តែទ្វារក្រោយនៃរថយន្តកុម៉ង់ក្រុមហ៊ុន មានតម្លៃប្រមាណ២ម៉ឺនដុល្លាសហរដ្ឋអាមេរិកទៅហើយនោះ ។
ករណីគ្រោះថ្នាក់ចរាចរណ៍នេះពិតជាសំណាងណាស់ ដែលរថយន្តធុនធំរបស់អង្គភាពកងពលតូចលេខង៧០ ជាន់ហ្វ្រាំងមិនស៊ីជ្រុលបុកគូថរថយន្ត ចុះបើកជ្រុលបុកហ្វូងមនុស្សកំពុងដើរឆ្លងផ្លូវ ឬក៏បុកម៉ូតូវិញ មិនដឹងថាមានមនុស្សប៉ុន្មាននាក់ ដែលត្រូវស្លាប់បាត់បង់ជីវិត ដោយសាររថយន្តជាន់ហ្វ្រាំងមិនស៊ីនេះ ។ អង្គភាពកងពលតូចលេខង៧០ គួពិនិត្យមើលលក្ខណៈបច្ចេកទេសរថយន្តឲ្យបានត្រឹមត្រូវ មុននឹងឲ្យមន្ត្រីរបស់ខ្លួនបើករថយន្តនៅលើដងផ្លូវសាធារណៈ៕ ស្អាងជ័យ
