រថយន្តម៉ាកសាំយ៉ុងបុករះម៉ូតូ២គ្រឿងស្លាប់ម្នាក់ របួសស្រាលម្នាក់

ខេត្តតាកែវ៖ ជនរងគ្រោះម្នាក់បានស្លាប់នៅពេលបញ្ជូនទៅកាន់មន្ទីរពេទ្យ និងម្នាក់ទៀតរងរបួសស្រាលក្នុងហេតុការណ៍គ្រោះថ្នាក់ចរាចរណ៍មួយរវាងម៉ូតូ នឹងរថយន្ត ។

ហេតុការណ៍នេះកើតឡើងនៅថ្ងៃទី៤ ខែកញ្ញា ឆ្នាំ២០១៧ វេលាម៉ោង ៩និង២០នាទីព្រឹក នៅលើផ្លូវលេខ ១៣២ ចន្លោះគីឡូម៉ែត្រលេខ ១៩-២០ ស្ថិតក្នុងភូមិស្ទឹង ឃុំអូរសារាយ ស្រុកត្រាំកក់ ខេត្តតាកែវ។

បើតាមសមត្ថកិច្ចបានឲ្យដឹងថា រថយន្តបង្ករហេតុខាងលើម៉ាកសាំយ៉ុង ពាក់ស្លាកលេខ ភ្នំពេញ 2AD-9341 បើកបរដោយឈ្មោះ ម៉ុន ស៊ុនហៀ ភេទប្រុស អាយុ២០ឆ្នាំ ជាសិស្ស រស់នៅភូមិព្រៃឃ្លៃ ឃុំស្រែចែង ស្រុកជុំគិរី ខេត្តកំពត ដែលបើកបរមកពីទិសខាងលិចទៅកើត លុះដល់ចំណុចកើតហេតុខាងលើបានទៅបុកម៉ូតូមួយគ្រឿងម៉ាក Honda Dream C125 ស៊េរី ២០១៥ ពណ៍ខ្មៅ ពាក់ស្លាកលេខ ភ្នំពេញ 1FD-9438 អ្នកបើកបរមិនស្គាល់អត្តសញ្ញាណ ភេទស្រី អាយុប្រហែល ៤០ឆ្នាំ បានស្លាប់នៅពេលបញ្ជូនទៅដល់មន្ទីរពេទ្យខេត្តតាកែវ ដែលបើកបរមកពីទិសដៅបញ្ច្រាស់គ្នា រួចរថយន្តនោះក៍រ៉េចង្កូតទៅកៀម៉ូតូមួយគ្រឿងទៀតម៉ាក Honda Dream C125 ស៊េរី ២០១៧ បើកបរដោយឈ្មោះ យៀល ចាន់ ភេទប្រុស អាយុ ២២ ឆ្នាំ រស់នៅភូមិរវាង ឃុំត្រពាំងរាំង ស្រុកជុំគិរី ខេត្តកំពត បណ្តាលឲ្យរងរបួសស្រាល ។

ក្រោយពេលកើតហេតុរថយន្តបង្ករព្យាយាមរត់គេចតែត្រូវបានកម្លាំងសមត្ថកិច្ចដេញស្ទាក់ចាប់តែរថយន្ត រីឯអ្នកបើកបររត់គេចខ្លួនបាត់ស្រមោល ។

បច្ចុប្បន្នកម្លាំងសមត្ថកិច្ចកំពុងស្វែងរកសាច់ញាតិសពស្ត្រីរងគ្រោះដើម្បីមកទទួលយកទៅធ្វើបុណ្យ ចំណែករថយន្ត និងម៉ូតូត្រូវបានកម្លាំងជំនាញយកមករក្សាទុក ដើម្បីកសាងសំណុំរឿងតាមច្បាប់៕ ភ្នំដា