សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ ក្មេងស្រីអាយុ៦ឆ្នាំម្នាក់បានបាត់បង់ជីវិតយ៉ាងអាណោចអាធ័ម ក៏ដោយអាស្រ័យបណ្តាលមកពីរថយន្តធុនធំបើកបរខ្វះការប្រុងប្រយ័ត្នមកបុក ។
ហេតុការណ៍នេះបង្កឲ្យភ្ញាក់ផ្អើលឡើងកាលពីវេលាម៉ោង១និង១០នាទីរសៀល ថ្ងៃទី៦ ខែតុលា ឆ្នាំ២០១៧ ស្ថិតនៅចំណុច ភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ ។
សេចក្តីរាយការណ៍ព័ត៌មានបានឲ្យដឹងថា ហេតុការណ៍គ្រោះថ្នាក់ចរាចរណ៍នេះបង្កឡើងដោយរថយន្ត ម៉ាក ហ៊ីយ៉ាន់ដាយ ពណ៌ស គ្មានស្លាកលេខ បើកបរដោយ ឈ្មោះ ភ្លក ភេទប្រុស អាយុ២២ឆ្នាំ រស់នៅ ខេត្តក្រចេះ ។ ក្រោយពីបង្កហេតុហើយនេះ អ្នកបើកបររថយន្តរូបនេះបានរត់គេចខ្លួនដោយសុវត្ថិភាព ។
សេចក្តីរាយការណ៍បន្តទៀតថា រថយន្តនេះបានបើកបុកក្មេងស្រីរងគ្រោះឈ្មោះ ពេជ ស្រីណែតអាយុ៦ឆ្នាំ រស់នៅភូមិ ឃុំ កើតហេតុបណ្តាលឲ្យស្លាប់យ៉ាងអាណោចអាធ័ម ។
បច្ចុប្បន្ន សពជនរងគ្រោះត្រូវសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។ រីឯវត្ថុតាងត្រូវបានយកមករក្សារទុកនៅអធិការដ្ឋាននគរបាលស្រុកវាលវែងដើម្បីដោះស្រាយតាមក្រោយ៕ ប៉ឹម ពិន
