សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរស៣នាក់រងរបួសធ្ងន់ ស្រាលដោយករណីគ្រោះថ្នាក់ចរាចរណ៍រវាងម៉ូតូបុកស្របទិសគ្នាកាលពីវេលាម៉ោង៥និង៤៥នាទីល្ងាច ថ្ងៃទី១៦ ខែតុលា ឆ្នាំ២០១៧ នៅលើផ្លូវជាតិលេខ១ ស្ថិតក្នុងភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង។
តាមសមត្ថកិច្ចនគរបាលស្រុកបានឲ្យដឹងថា អ្នកបើកម៉ូតូបង្កហេតុ ឈ្មោះ យឹម សុភ័ណ្ឌ អាយុ៣១ឆ្នាំ មុខរបរបុគ្គលិកធនាគារឯកជន មានទីលំនៅភូមិថ្នល់កែង ឃុំពពែត ស្រុកស្វាយទាប ខេត្តស្វាយរៀងខណៈស្រវឺងស្រាជោក រងរបួសធ្ងន់ ត្រូវបានដឹកមកកាន់មន្ទីរពេទ្យខេត្តស្វាយរៀង។
ចំណែកជនរងគ្រោះ២នាក់ឪពុកកូនមានឈ្មោះ មាស សាវ៉េត អាយុ ៤៥ឆ្នាំ មុខរបរជាកសិករ និងកូនស្រីមានឈ្មោះ សេង សុឃីម អាយុ១០ឆ្នាំ មុខរបរជាសិស្ស មានទីលំនៅភូមិ ថ្នលកែង ឃុំកណ្តៀរាយ ស្រុកស្វាយទាប ខេត្តស្វាយរៀងដោយជិះម៉ូតូមួយគ្រឿងម៉ាក់ ហុងដា សេ ១០០ ស៊េរីចាស់ អត់ស្លាកលេខ ខូចខាតយ៉ាងដំណំ។
តាមសាក្សីបានឲ្យដឹងថា មុនកើតហេតុមានបុរសម្នាក់ជិះម៉ូតូមួយគ្រឿងម៉ាក់ហុងដា សេ១០០ ស៊េរីចាស់ អត់ស្លាកលេខបានឌុបកូនស្រីធ្វើដំណើរពីកើតមកលិចលើកំណាត់ផ្លូវជាតិលេខ១ ខណៈនោះស្រាប់តែមានម៉ូតូម៉ាកហុងដាសេ១២៥ ពណ៌ខ្មៅ សេរី២០១៦ អត់ស្លាកលេខ បើកបរដោយបុរសម្នាក់សង្ស័យស្រវឺងស្រាជិះរេពេញផ្លូវ ស្រាប់តែទៅបុកពីក្រោយពេញទំហឺងបណ្ដាលឲ្យដួលសន្លប់ស្ដូកស្ដឺង។
ក្រោយមក សមត្ថកិច្ចបានមកដល់វាស់វែង និងដឹកមកកាន់មន្ទីរពេទ្យខេត្ត និងវាស់វែងព្រមទាំងអូសវត្ថតាងទាំង២គ្រឿងយកមករក្សាទុកនៅអធិការដ្ឋានស្រុកស្វាយទាបដើម្បីរង់ចាំដោះស្រាយនៅពេលក្រោយ៕ យឹម សុថាន
