សារព័ត៌មាន នគរវត្ត តែងតែនាំមុខគេជានិច្ច
បទល្មើសនៃការដឹកជញ្ជូនឈើនៅខេត្តក្រចេះត្រូវគេរាយការណ៍ថាបានកើតមានជាធម្មតា ក្រោមក្រសែភ្នែកសមត្ថកិច្ចជំនាញ និងមិនជំនាញជាច្រើនស្ថាប័ន ។ ក្នុងនោះពួកឈ្មួញអះអាងថា មន្ត្រីកងកម្លាំងប្រដាប់អាវុធ ដែលប្រចាំការនៅខេត្តក្រចេះ ក៏ត្រូវពួកគេបង់ប្រាក់ឲ្យដែរ បើទោះបីជាពេលនេះត្រូវបានថ្នាក់លើបញ្ជាឲ្យដកប៉ុស្តិ៍ក៏ដោយ។
ប្រភពបានឲ្យដឹងថា លោក ឈឹម ផល្លី មន្ត្រីកងទ័ពជើងគោកផ្នែក ដឺបេ ប្រចាំការនៅខេត្តក្រចេះដែលកាលមុន មានកូនចៅនៅតាមផ្លូវជាតិពីខេត្តស្ទឹងត្រែង មុនចូលទីរួមខេត្តក្រចេះ និងនៅស្រុកស្នួល បានដាក់កម្លាំងសម្ងាត់នោះពេលនេះត្រូវបានស្នើឲ្យដកចេញ ប៉ុន្តែពួកឈ្មួញនៅតែត្រូវបង់ប្រាក់ដដែល។ ប្រភពរាយការណ៍ថា ប្រាក់ដែលបង់នោះមិនត្រឹមតែសម្រាប់លោកឈឹម ផល្លីប៉ុណ្ណោះទេ ប៉ុន្តែគឺសម្រាប់ថ្នាក់លើថែមទៀតផង។
ក្រុមអ្នករកស៊ីឈើបានអះអាងថា វាជាការយោគយល់គ្នារវាងឈ្មួញនឹងសមត្ថកិច្ច។ ពួកឈ្មួញនិយាយថា នៅខេត្តក្រចេះ បើនិយាយពីស្ថាប័នដែលត្រូវបង់ប្រាក់វិញនោះ មានច្រើនខ្លាំងណាស់ គ្រាន់តែខ្លះតិចតួច និងខ្លះបង់រាប់ពាន់ដុល្លារ។ សម្រាប់ក្រុមសមត្ថកិច្ចរបស់លោកឈឹម ផល្លី ត្រូវពួកឈ្មួញអះអាងថា បានបង់ជូនគាត់ដែរ ប៉ុន្តែមិនច្រើនដូចសមត្ថកិច្ចជំនាញទេ។ ម្យ៉ាងទៀត គឺលោកក្រុមលោកឈឹម ផល្លី ដែលពីមុនរកទុកសម្រាប់ខ្លួនឯង ផ្ទុយទៅវិញពេលនេះ ក៏បង់ជូនថ្នាក់លើដែរ៕
