សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តាមសេចក្តីរាយការណ៍ពីប្រជាពលរដ្ឋបានឲ្យដឹងថា កន្លែងលេងបាល់ទះ និងបុកប៊ីយ៉ា បង្កប់ល្បែងសុីសង មួយកន្លែងស្ថិតនៅតាមបណ្តោយផ្លូវលេខ៤៧៤ ក្នុងសង្កាត់ទួលទំពូង១ ខណ្ឌចំការមន មានការលួចលាក់បង្កប់ល្បែងស៊ីសង នៅជាន់ឡៅតឿ។
ប្រជាពលរដ្ឋបានឲ្យដឹងទៀតថា ប្រសិនបើយើងធ្វើដំណើរតាមបណ្តោយផ្លូវលេខ៤៧៤ នេះ យើងពិតជាបានឃើញកន្លែងលេងបាល់ទះពីរទៅបីកន្លែង ប៉ុន្តែខុសប្លែក តែកន្លែងលេងបាល់ទះមួយកន្លែងខុសពីកន្លែងលេងបាល់ទះដទៃទៀត។
នៅកន្លែងនោះ ត្រូវបានគេរាយការណ៍ថា ជាកន្លែងលេងល្បែងបៀរ និងអាប៉ោង ហើយមានតែមនុស្សដែលធ្លាប់ស្គាល់ ឬក៏ភ្ញៀវរបស់គេប៉ុណ្ណោះ ទើបអនុញ្ញាតឲ្យមានសិទ្ធិឡើងទៅលើបាន ដោយឡែកអ្នកលេងបាល់ទះ និងអ្នកលេងបុកប៊ីយ៉ា ធម្មតា គឺមិនត្រូវអនុញ្ញាតឲ្យឡើងទៅខាងលើនោះទេ ហើយរហូតមកទល់ពេលនេះ អ្នកលេងល្បែងបៀរ និងអាប៉ោង ទាំងនោះ ក៏កំពុងលេងយ៉ាងត្រជាក់ល្ហឹម ដោយគ្មានបារម្ភអ្វីផងដែរ ជារៀងរាល់ថ្ងៃ ក៏ព្រោះតែគេមានទីតាំងអំណោយផល មានការបិទបំាង បានយ៉ាងល្អគឺដោយសារតែសមត្ថកិច្ចដឹងហើយមិនហ៊ានបង្ក្រាប។
ប្រជាពលរដ្ឋព្រួយបារម្ភយ៉ាងខ្លាំង ការរីកដុះដាលទីតាំង ដែលបង្កប់ទៅដោយល្បែងស៊ីសងខាងលើនោះ មិនត្រឹមតែជាការអូសទាញឲ្យប្រជាពលរដ្ឋ ឈ្លក់វង្វេង បាត់បង់ទ្រព្យសម្បត្តិ បែកបាក់ក្នុងសង្គមគ្រួសារប៉ុណ្ណោះទេ ប្រភពនៃបនល្បែងទាំងនេះ បានក្លាយទៅជាប្រភពនៃបទល្មើសកើតមានក្នុងសង្គមយ៉ាងធ្ងន់ផងដែរ ។
ប្រជាពលរដ្ឋទទួលស្គាល់ថា ការអនុវត្តគោលនយោបាយភូមិ ឃុំមានសុវត្ថិភាព ពិតជាមានអត្ថប្រយោជន៍ខ្ពស់បំផុតសម្រាប់រក្សាសន្តិសុខ សណ្តាប់ធ្នាប់ជូនប្រជាពលរដ្ឋក្នុងសង្គម ។ ប៉ុន្តែ ភាពធូរលុង អនុញ្ញាតឲ្យល្បែងស៊ីសងកើតមានពេញបន្ទុកបែបនេះ ក៏ជាកំហុសរបស់អាជ្ញាធរ និងសមត្ថកិច្ចក្នុងមូលដ្ឋាន ចាត់ទុកថា មានចេតនាចិញ្ចឹមបទល្មើស ផ្ទុយពីជាអ្នកអនុវត្តច្បាប់ រៀបចំសន្តិសុខសណ្តាប់ធ្នាប់ជូនប្រជាពលរដ្ឋក្នុងមូលដ្ឋាន ៕ ស រស្មី
