សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សំណង់របងថ្មដ៏រឹងមាំ១កន្លែង មានទីតាំងស្ថិតនៅខាងលិចផ្លូវបេតុងទល់ មុខបុរីអង្គរភ្នំពេញ ស្ថិតក្នុងភូមិបឹងរាំង សង្កាត់ទួលសង្កែទី២ ខណ្ឌឫស្សីកែវ ជា កម្មកសិទ្ធិ លោកឧកញ៉ា ឆាយ សេងអៀង បានលួចសាងសង់រួច៣០ភាគរយទាំងគ្មាន លិខិតអនុញ្ញាត ហើយបានប្រើគ្រឿងចក្រ ជីកគាស់ដាក់ប្រព័ន្ធលូបង្ហូរទឹកធ្វើឲ្យប៉ះ ពាល់ដល់ប្រឡាយមេ ត្រូវបានអាជ្ញាធរ ខណ្ឌចាត់វិធានការមិនលើកលែងឲ្យនោះ ឡើយ ។
លោក ជា ពិសី អភិបាលខណ្ឌដឹកនាំមន្រ្តីចាត់វិធានការយ៉ាងសស្រាក់សស្រាំ ក្នុងការរំដោះទឹកចេញពីរាជធានីភ្នំពេញ ដើម្បីបញ្ជៀសការលិចលង់ផ្ទះប្រជាពល រដ្ឋ ក្រោយទទួលបានការណែនាំពីលោក ឃួង ស្រេង អភិបាលរាជធានីភ្នំពេញ តែបែរជាលោកឧកញ៉ារូបនេះមកសង់សំណង់រឹងគ្មានច្បាប់មករាំងស្ទះលំហូរទឹកទៅវិញ។
ការពីថ្ងៃទី៧ ខែវិច្ឆិកា លោក ជា ពិសី បានដឹកនាំកម្លាំងចុះត្រួតពិនិត្យភ្លាមៗ ពីស្ថានភាពប្រឡាយ និងនាំយកគ្រឿងចក្រទៅស្ដារ បើកមុខផ្លូវទឹកឱ្យបានធំទូលាយ ចាប់ពីផ្លូវលេខ៥៩៨ ហៅផ្លូវជាសុផារ៉ា មកប៉ែកខាងលិចធ្លាក់ មកដល់ ប្រឡាយអូរអង្កាមជាប់ផ្លូវបុរីអង្គរភ្នំពេញ ចូលមកតាមប្រឡាយអូរអាគុជរហូតធ្លាក់ទៅដល់ផ្លូវទំនប់កប់ស្រូវ ដើម្បីរំដោះការលិចលង់ពីជំនន់ទឹកភ្លៀង ជូនប្រជាពល រដ្ឋជាច្រើនគ្រួសារ ស្ថិតក្នុងភូមិបឹងរាំង សង្កាត់ទួលសង្កែទី២ និងភូមិ៤ សង្កាត់ច្រាំងចំរេះទី១ ខណ្ឌឫស្សីកែវ ។
លោក ជា ពិសី បានថ្លែងថា បន្ទាប់ពីនាំយកគ្រឿងចក្រស្ដារប្រឡាយ ដើម្បីរំដោះការលិចលង់ផ្ទះប្រជាពលរដ្ឋ រដ្ឋបាលខណ្ឌឫស្សីកែវ គ្រោងធ្វើផ្លូវប្របមាត់ ប្រឡាយ១ខ្សែឲ្យចេញជារូបរាងក្នុងពេលឆាប់ៗខាងមុខ ដែលមានប្រវែងប្រហែល២៧០០ម៉ែត្រ ទទឹង៣០ម៉ែត្រ និងជួសជុលអណ្ដូងលូ ជង្ហុកតូចធំ (សំបុកមាន់) ក្រោយពីធ្វើរបាយការណ៍យ៉ាងលម្អិតមួយ ដើម្បីស្នើសុំទៅអភិបាលរាជធានីភ្នំពេញសម្រេចពាក់ព័ន្ធការស្ថាបនា ។
លោក ជា ពិសី បានថ្លែងទៀតថា ពិសេសកំណត់ពីផលប៉ះពាល់ចំពោះម្ចាស់ក្បាលដីឡូត៍មួយចំនួន ក្រោយឆ្នាំ២០១៥ បានសាងសង់សំណង់របងផ្ទះតូចធំ លើដីចំណីប្រឡាយ ដោយគ្មានស្នើសុំច្បាប់អនុញ្ញាត ចាំបាច់ទាមទារសហការ បើកមាត់ប្រឡាយឲ្យបានធំទូលាយ និង ត្រូវអញ្ជើញមកពិភាក្សាសុំឱ្យជួយសម្ប ទានពីសំណាក់ប្រជាពលរដ្ឋ តើមានប៉ុន្មានគ្រួសារ? ក្នុងការស្ថាបនាផ្លូវ១ខ្សែ ចាប់ពីផ្លូវបុរីអង្គរភ្នំពេញ កាត់តាមហ្គ្រែនភ្នំពេញ រហូតមកដល់ផ្លូវទំនប់កប់ស្រូវ ដោយអាចសម្រួលទាំងការធ្វើដំណើរ និងបញ្ជៀស បានទាំងការលិចលង់ពីជំនន់ទឹកភ្លៀង។
លោកអភិបាលខណ្ឌបន្តថា ប្រសិនបើការស្ថាបនាផ្លូវ១ខ្សែនេះ ទទួលបានជោគជ័យ មិនត្រឹមតែអាចបញ្ជៀសទាំង ការលិចលង់ពីជំនន់ទឹកភ្លៀងនោះទេ ពិសេសអាចជួយកាត់បន្ថយបញ្ជៀសការកកស្ទះចរាចរណ៍នៅលើដងផ្លូវ៥៩៨ ហៅផ្លូវជាសុផារ៉ា បានមួយចំណែកក៏ដូចជាផ្លូវជាតិលេខ៥ផងដែរ ៕ ហេង សូរិយា
