ស្រវឹងជោកបើករថយន្ដបុករថយន្ដសេរីទំនើប៥៧០មួយគ្រឿងពីក្រោយពេញទំហឹងបណ្ដាលឲ្យខូចខាតហើយចុះគេចខ្លួនបាត់

ភ្នំពេញ៖ បុរសម្នាក់ស្រវឹងស្រាបើករថយន្ដម៉ាកសាំយ៉ុងមួយគ្រឿង ក្នុងល្បឿនលឿនមិនប្រយ័ត្នជ្រុលបុកគូទរថយន្ដសេរីទំនើបម៉ាកឡិចស៊ីស570ពីក្រោយ យ៉ាងពេញទំហឹង ដែលកំពុងបន្ថយល្បឿនស៊ីញ៉ូបត់ឆ្លងផ្លូវបណ្ដាលឲ្យរងការខូចខាតទាំងសងខាង ហើយក្រោយពីបង្កហេតុម្ចាស់រថយន្ដបង្កបើកទ្វារចុះពីរថយន្ដគេចខ្លួនបាត់។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង២៣និង៣០នាទី ថ្ងៃទី១៣ ខែវិច្ឆិកា ឆ្នាំ២០១៧ នៅចំណុចខាងស្ថានទូត ម៉ាឡេស៊ី តាមបណ្ដោយផ្លូវព្រះនរោត្ដម ក្នុងសង្កាត់ ទន្លេបាសាក់ ខណ្ឌចំកាមន រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្ដៅឡិចស៊ីស 570 ពណ៌ខ្មៅពាក់ស្លាកលេខ ភ្នំពេញ2Z-6688 ធ្វើដំណើរក្នុងទិសដៅពីជើងទៅត្បូងពេលមកដល់ចំណុចកើតហេតុ ក៏បន្ថយល្បឿនស៊ីញ៉ូឆ្វេងបត់ឆ្លងផ្លូវតែមិនទាន់បានបត់ផង ក៏ត្រូវរថយន្ដសាំយ៉ុងពណ៌ស ពាក់ស្លាកលេខ ភ្នំពេញ 2A-8266 ដែលបើកបរដោយបុរស់ម្នាក់ ស្ថិតក្នុងស្ថានភាពស្រវឹង បើកមកពីក្រោយបុកយ៉ាងពេញទំហឹងបណ្ដាលឲ្យរថយន្ដឡិចស៊ីសខូចខាត ផ្នែកខាងក្រោយយ៉ាងដំណំចំណែករថយន្ដបង្ករងការខូចខាតផ្នែកខាងមុខស្ទើរតែទាំងស្រុង។

ប្រភពបានបន្តថា ក្រោយពីបង្កហេតុរថយន្ដបង្កបានព្យាយាមបើកគេចខ្លួនបានប្រហែល50ម៉ែត្រ ដោយរថយន្ដខូចខាតខ្លាំងពេកមិនអាចបើកទៅមុខបានទៀត ទើបម្ចាស់រថយន្ដចុះពីរថយន្ដគេចខ្លួនបាត់។

ក្រោយមកទើបកម្លាំងសមត្ថកិច្ចមូលដ្ឋានចុះដល់កន្លែងកើតហេតុវាស់វែងយករថយន្ដទាំងពីរគ្រឿងយកទៅរក្សាទុកនៅការិយាល័យចរាចរណ៍រាជធានីភ្នំពេញដើម្បីរង់ចាំម្ចាស់រថយន្ដបង្កចូលខ្លួនមកដោះស្រាយតាមផ្លូវច្បាប់៕ ភារ៉ា ដង្កោ