សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍គួរឲ្យរន្ធត់និងតក់ស្លុតបំផុត ខណៈស្ត្រីចំណាស់ម្នាក់បានស្លាប់ និងម្នាក់ទៀតរងរបួសស្រាលបន្ទាប់ពីត្រូវរថយន្តបើកបុកម៉ូតូពីក្រោយពេញទំហឹងកាលពីវេលាម៉ោង១១និង១០នាទីព្រឹកថ្ងៃសុក្រ ៥រោច ខែមិគសិរ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៨ ខែធ្នូ ឆ្នាំ២០១៧ នៅចំណុចលើផ្លូវជាតិលេខ១គីឡូម៉ែត្រលេខ១៣៧លេខ១៣៨ ស្ថិតក្នុងភូមិ ប្រសូត្រ២ ឃុំកណ្តៀងរាយ ស្រុក ស្វាយទាប ខេត្តស្វាយរៀង ។
យោងតាមសមត្ថកិច្ចនគរបាលស្រុកបានប្រាប់កាសែតនគរវត្តថា ស្ត្រីដែលរងរបួសស្រាលមានឈ្មោះ វ៉ាន់ លីដា ភេទស្រី អាយុ២៤ឆ្នាំ ជនជាតិខ្មែរ មុខរបរ កសិករ និងអ្នករួមដំណើរម្នាក់ដែលស្លាប់មានរ័ត្ន មន្ទីរ៉េត ភេទស្រី អាយុ ៦០ឆ្នាំ មុខរបរ កសិករ អ្នកទាំងពី មានទីលំនៅភូមិ ដើមពោធិ៍ ឃុំ ស្វាយតាយាន ស្រុកស្វាយតាយាន ខេត្តស្វាយរៀង ខណៈម៉ូតូម៉ាក ហុងដាឌ្រីម សេចក្តី ស៊េរីឆ្នាំ២០១៦ ពណ៌ខ្មៅ ស្លាកលេខ ស្វាយរៀង ១H ៥៧៤៧ ខូចខាតយ៉ាងដំណំ។
ចំណែកភាគីរថយន្តបង្កហេតុមានឈ្មោះ ធុន សំបូរ ភេទប្រុស អាយុ២៥ឆ្នាំ ជនជាតិខ្មែរ មុខរបរ បើកបររថយន្តដឹកកម្មករ មានទីលំនៅ ភូមិជប់ ឃុំកណ្តៀងរាយ ត្រូវបានសមត្ថកិច្ចឃាត់ខ្លួន បន្ទាប់ពីរត់គេចខ្លួនបានប្រមាណ១០នាទី។
តាមសាក្សីបានប្រាប់ថា មុនកើតហេតុមានរថយន្តម៉ាកហ៊ីយ៉ាន់ដាយ ទម្ងន់១.៥០តោន ពណ៌ខៀវ ស្លាកលេខ ភ្នំពេញ ២AL ៥៧១៦ បើកបរដោយបុរសម្នាក់បានធ្វើដំណើរ ទិសដៅពីលិចទៅកើត លើផ្លូវជាតិលេខ១ ខណៈនោះមានម៉ូតូម៉ាក ហុងដាឌ្រីម សេចក្តី ស៊េរីឆ្នាំ2016 ពណ៌ខ្មៅ ស្លាកលេខ ស្វាយរៀង ១H ៥៧៤៧ ជិះគ្នា២នាក់ទិសដៅស្របគ្នាស្រាប់តែរថយន្តបុកពីគ្រោយពេញទំហឺងលាន់សូរដូចរន្ទះ បណ្ដាលឲ្យដួលរណូករណែលពេញផ្លូវត្រូវបានអ្នកភូមិ ក៏ដូចជាអ្នកធ្វើដំណើរជួយសង្គ្រោះ និងរាយការណ៍មកសមត្ថកិច្ចមូលដ្ឋានមកអន្តរាគមន៍ព្រមទាំងដេញចាប់អ្នកបង្កហេតុមកសាកសួរផងដែរ។
ចំពោះមធ្យោបាយទាំង២គ្រឿងត្រូវបានសមត្ថកិច្ចជំនាញយកមករក្សាទុកនៅអធិការដ្ឋាននគរបាលស្រុក និងកសាងសំណុំរឿងតាមច្បាប់ ។
សពត្រូវបានសមត្ថកិច្ចនគរបាលប្រគល់ទៅឲ្យក្រុមគ្រួសារយកធ្វើបុណ្យតាមប្រពៃណីទាំងក្ដុកក្ដួលបំផុត ៕ យឹម សុថាន
