សារព័ត៌មាន នគរវត្ត តែងតែនាំមុខគេជានិច្ច
បទល្មើសនេសាទនៅស្រុកអង្គរបុរី ក៏ដូចជាស្រុកបុរីជលសាខេត្តតាកែវ កំពុងកើតមានយ៉ាងគគ្រឹកគគ្រេង ដោយសារតែពួកមន្ត្រីជលផលអនុញ្ញាតឲ្យអ្នកនេសាទជនជាតិវៀតណាមចូលមកនេសាទដោយសេរី និងអនាធិបតេយ្យដោយពួកគេគ្រាន់តែបង់លុយជូនមន្ត្រីជលផលប្រចាំតំបន់តែប៉ុណ្ណោះ។ បុរសជនជាតិវៀតណាម ដែលជាអ្នកសម្របសម្រួលរត់ការក្នុងការប្រព្រឹត្តបទល្មើសនេសាទនៅស្រុកអង្គរបុរីអះអាងថា លោកអ៊ឹម ផាត នាយសង្កាត់សង្កាត់រដ្ឋបាលជលផលស្លែង ក្នុងស្រុកអង្គរបុរីជាអ្នកប្រមូលផលប្រយោជន៍ទាំងស្រុងពីបទល្មើស ដែលអនុញ្ញាតឲ្យជនជាតិវៀតណាមចូលនេសាទ។
ប្រភពព័ត៌មានពីបុរសជនជាតិវៀតណាម ដែលជាមេការប្រមូលប្រាក់ឲ្យលោកអឹម ផាត បានឲ្យដឹងថា ទូកនេសាទជនជាតិវៀតណាមរាប់រយគ្រឿងចូលមកប្រព្រឹត្តបទល្មើសក្នុងដែននេសាទខ្មែរ ដោយដាក់ដាយ របាំងព្រួល និងទូកកន្ទុយកណ្តុរបានធ្វើសកម្មភាពជារៀងរាល់ថ្ងៃ ។ បើអ្នកនេសាទខ្មែរវិញ ត្រូវអ៊ឹម ផាតចាប់យកទៅដាក់គុកច្រវាក់មិនខានឡើយ។ ប៉ុន្តែសម្រាប់អ្នកនេសាទវៀតណាមចូលមកនេសាទក្នុងដែនទឹកខ្មែរ ក្នុងស្រុកអង្គរបុរីតាមចិត្ត ដោយគ្រាន់តែបង់លុយឲ្យលោកអ៊ឹម ផាត។ បុរសជនជាតិវៀតណាមម្នាក់អះអាងថា ទូកនេសាទវៀតណាម១គ្រឿង ត្រូវបង់ប្រាក់ឲ្យលោកអ៊ឹម ផាត ចាប់ពី១២លានដុង ឬប្រហាក់ប្រហែល៧រយដុល្លារ ទើបអាចចូលនេសាទបាន។
ក្នុងរដូវដែលមានសកម្មភាពនេសាទខ្លាំងនេះ លោកអ៊ឹម ផាត អាចប្រមូលបានប្រាក់រាប់ម៉ឺនដុល្លារ។ ជាមួយគ្នានោះ ក៏មានបទល្មើសទ្រង់ទ្រាយធំផ្សេងទៀតក្នុងអង្គរបុរី ដែលស្ថិតក្រោមការគ្រប់គ្រងរបស់លោក ខឹម ប៊ុនថន នាយផ្នែករដ្ឋបាលជលផលអង្គរបុរី។ លោកខឹម ប៊ុនថន គ្រប់គ្រងបទល្មើសក្នុងការអនុញ្ញាតឲ្យជនជាតិវៀតណាមចូលមកដាក់សម្រាស់ ដែលអាចប្រមូលទិន្នផលត្រីរាប់តោននៅពេលប្រមូលផលម្តងៗ។ អ្វីដែលធ្វើឲ្យប្រជាពលរដ្ឋក្នុងស្រុកអង្គរបុរី ក៏ដូចជាបុរីជលសាឈឺចាប់បំផុតនោះ គឺពលរដ្ឋខ្មែរម្ចាស់ស្រុកមិនត្រូវក្រុមមន្ត្រីជលផលអនុញ្ញាតឲ្យចូលនេសាទត្រីដើម្បីចិញ្ចឹមក្រពះទេ គឺពួកមន្ត្រីជលផលអ៊ឹម ផាត ក៏ដូចជាខឹម ប៊ុនថន អនុញ្ញាតឲ្យតែជនជាតិវៀតណាម ដែលបង់ប្រាក់ឲ្យខ្លួនប៉ុណ្ណោះ ទើបអាចចូលនេសាទបាន៕
លោកខឹម ប៊ុនថន
