បុរសម្នាក់បើករថយន្តម៉ាកកាមេរីហាយប្រីតជ្រុលចង្កូតទៅបុកដើមឈើនៅមុខសាលាបឋមសិក្សាបឹងត្របែកខាងត្បូង

ភ្នំពេញ៖ បុរសម្នាក់ បើករថយន្តមួយគ្រឿងម៉ាកកាមរីហាយប្រីត ហើយបានរេចង្កូតជ្រុលទៅបុកដើមឈើ និងរបងសាលា បឋមសិក្សាបឹងត្របែកខាងត្បូង ផុងចូលទៅក្នុងមួយកំណាត់ រងការខូចខាតផ្នែកខាងមុខ។

ហេតុការណ៍នេះ កើតឡើងកាលពីវេលាម៉ោង៣និង៣០នាទីទៀបភ្លឺ ឈានចូលថ្ងៃ ព្រហស្បតិ៍ ៤កើត ខែបុស្ស ឆ្នាំ រកា នព្វស័ក ព.ស ២៥៦១ ត្រូវនឹងថ្ងៃទី២១ ខែធ្នូ ឆ្នាំ២០១៧ ស្ថិតនៅមុខរបងសាលាបឋមសិក្សាបឹងត្របែកខាងត្បូង តាមបណ្តោយផ្លូវលេខ៤៣០ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។

បើតាមប្រភពព័ត៌មានពីកន្លែង ឲ្យដឹងថាមុនពេលកើតហេតុ គេឃើញបុរសម្នាក់បើករថយន្តមួយគ្រឿងម៉ាកកាមេរីហាយប្រីត ពណ៌ខ្មៅ ពាក់ស្លាកលេខ ភ្នំពេញ 2T-5253 ខណៈមកដល់ចំណុចកើតហេតុខាងលើរថយន្តបើកលឿនពេក ក៏បានជ្រុលចង្កូតទៅបុកដើមឈើខាងមុខរបងសាលាបឋមសិក្សាបឹងត្របែកខាងត្បូង ហើយបុកជញ្ជាំងសាលាផុងចូលក្នុងបាក់អស់១ផ្ទាំង និងបាក់ដើមឈើមួយដើមទៀត។

តែសំណាងល្អមិនបង្កឲ្យមានមនុស្សរងរបួសនោះទេ ហើយភ្លាមៗនោះម្ចាស់រថយន្តបង្កបានបើកទ្វាររថយន្តចេញពីកន្លែងកើតហេតុ ស្រាប់តែមួយសន្ទុះក្រោយមក ទើបឃើញត្រឡប់មកវិញ ចំណែករថយន្តរងការខូចខាតផ្នែកខាងមុខយ៉ាងដំណំ។

ក្រោយពេលកើតហេតុ សមត្ថកិច្ចជំនាញក៏បានចុះមកវាស់វែងយករថយន្តបង្កយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញដើម្បីឲ្យម្ចាស់រថយន្តដោះស្រាយទៅតាមនីតិវិធី៕ ស រស្មី