សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖បុរសម្នាក់បានស្លាប់នៅនឹងកន្លែង និង២នាក់ទៀតបានរត់គេចខ្លួនទាន់ ខណៈ រថយន្តលុច្សស៊ីស RX330 ១គ្រឿង បើកក្នុងល្បឿនយ៉ាងលឿនដូចហោះ ពេលបុរស ៣នាក់ ជិះម៉ូតូតាមផ្លូវ ស្រាប់តែម៉ូតូបែកកង់ បុរសម្នាក់ចុះបណ្ដើរ និង ២នាក់ទៀត ដើរនៅជិតគ្នា ភ្លាមនោះ ក៏ត្រូវមកបុកពីក្រោយយ៉ាងពេញទំហឹង។
ហេតុការណ៍ដ៏រន្ធត់នេះ បានកើតឡើងកាលពីម៉ោង ៥និង៣០នាទី ព្រលឹមថ្ងៃសៅរ៍៦កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៣ ខែធ្នូូ ឆ្នាំ២០១៧នៅចំណុចមុខក្រុមហ៊ុន គូបូតា ស្ថិតតាមបណ្ដោយផ្លូវជាតិលេខ៦ ស្ថិតនៅក្នុងសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
សមត្ថកិច្ចនៅកន្លែងកើតហេតុបានឲ្យដឹងថា បុរសដែលស្លាប់ខាងលើមានឈ្មោះ រឿន ថេន អាយុ ៥៤ឆ្នាំ មុខរបរ ធ្វើការសំណង់ ស្នាក់នៅម្ដុំមូមិចំបក់មាស ខណ្ឌជ្រោយចង្វា។
យោងទៅតាមសម្តីបុរស ២នាក់ ដែលជិះម៉ូតូជាមួយនឹងបុរសដែលបាត់បង់ជីវិតខាងលើបានឱ្យដឹងថា មុនពេលកើតហេតុពួកគាត់បានជិះម៉ូតូ ១គ្រឿង ម៉ាកឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ 1FV-6887 ធ្វើដំណើរតាមបណ្ដោយផ្លូវជាតិលេខ៦ ក្នុងទិសដៅពីលិចទៅកើត ស្រាប់តែម៉ូតូបែកកង់ ហើយបុរសដែលស្លាប់ខាងលើ ក៏ចុះបណ្ដើរម៉ូតូ ខណៈដែលមកដល់ចំណុចកើតហេតុ ក៏មានរថយន្ដឡុចស៊ីស RX330 ១គ្រឿង មិនចាំស្លាកលេខ បានជិះក្នុងល្បឿនលឿនដូចហោះបើកមកបុកពីក្រោយពេញទំហឹង បណ្តាលឲ្យបុរសរងគ្រោះ ខ្ទាតជាច្រើនម៉ែត្រ បណ្តាលឲ្យស្លាប់ភ្លាមៗនៅនឹងកន្លែងចំណែកបុរស ចំណែកខ្លួននឹងមិត្តភក្តិម្នាក់ដើរនៅជិតគ្នានោះ បានរត់គេចទាន់។
ក្រោយពេលកើតហេតុ សមត្ថកិច្ចចុះមកកន្លែងកើតហេតុដើម្បីសួរនាំស្វែងរកបងប្អូនមកដឹកសពយកទៅធ្វើបុណ្យតាមប្រពៃណី ចំណែកម៉ូតូជនរងគ្រោះត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌជ្រោយចង្វារង់ចាំបងប្អូនយកឯកសារពាក់ព័ន្ធមកទទួលយកវិញ ៕ ជ្រោយពេជ្រ
