សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ៖ គ្រោះថ្នាក់ចរាចរណ៍មួយបានកើតឡើងរវាងម៉ូតូ នឹងម៉ូតូក្នុងទិសដៅបញ្ច្រាសគ្នាបណ្តាលឲ្យមនុស្ស២នាក់រងរបួសធ្ងន់ស្រាល កាលពីថ្ងៃអាទិត្យ ៧កើត ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៤ ខែធ្នូ ឆ្នាំ២០១៧ ស្ថិតនៅតាមបណ្តោយផ្លូវជាតិលេខ១៧៤ ក្នុងភូមិថ្នល់កែង ឃុំអន្លង់វែង ស្រុកអន្លង់វែង ខេត្ដឧត្តរមានជ័យ។
មន្ត្រីនគរបាលស្រុកអន្លង់វែងបានឲ្យដឹងថា ជនរងគ្រោះទី១.ឈ្មោះ ស ហាក់ ភេទប្រុស អាយុ១៦ឆ្នាំ រងរបួសស្រាល បើកបរម៉ូតូ១គ្រឿង ម៉ាកវេវ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ឧត្តរមានជ័យ 1C-9172 មានទីលំនៅភូមិថ្នល់កែង ឃុំអន្លង់វែង ស្រុកអន្លង់វែង និងទី២.ឈ្មោះ សូ គា ភេទស្រី អាយុ៣៩ឆ្នាំ បើកបរម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៤ ពណ៌ខ្មៅ គ្មានស្លាកលេខ រស់នៅភូមិ-ឃុំជាមួយគ្នា រងរបួសបាក់ភ្លៅខាងស្តាំ។
នគរបាលទទួលផែនចរាចរណ៍របស់អធិការដ្ឋានគរបាលស្រុកអន្លង់វែងបានឲ្យដឹងថា ក្រោយពីមានគ្រោះថ្នាក់ចរាចរណ៍នេះកើតឡើង មន្រ្តីជំនាញបានចុះទៅដល់កន្លែងកើតហេតុដើម្បីវាស់វែង និងយកជនរងគ្រោះទាំង២នាក់ ទៅសង្គ្រោះនៅមន្ទីរពេទ្យបង្អែកស្រុកអន្លង់វែង។ ដោយឡែកម៉ូតូទាំង២គ្រឿង សមត្ថកិច្ចយកមករក្សាទុកនៅអធិការដ្ឋាននគរបាលស្រុករង់ចាំដោះស្រាយនៅពេលក្រោយ៕ ប៉ែន នួន
