សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង៖ មន្ត្រីគយស្រុកស្រែអំបិល នៅតែធំក្លិនពុំសូវស្រួល ខណៈមានការបែកធ្លាយរឿង ប្រមូលពន្ធក្រៅបញ្ជីរដ្ឋ និងធ្វើការងារខុសវិជ្ជាជីវៈ។
ប្រភពបានឲ្យដឹងថា មានទំនិញជាច្រើនប្រភេទ ដែលដឹកតាមកប៉ាល់ មកឡើងនៅកំពង់ផែស្រែអំបិល រួមនិងរថយន្តដឹកទំនិញធំៗរាប់សិបគ្រឿងទៀត ដែលចេញពីដែនសមត្ថកិច្ចគយស្រែអំបិល គឺសុទ្ធតែគ្មានការត្រួតពិនិត្យ និងបង់ពន្ធឲ្យគ្រប់គ្រាន់ចូលរដ្ឋឡើយ។
ប្រភបានបង្ហើបថា ដោយសារការសម្រុកនាំចូលទំនិញពីប្រទេសថៃ មានការកើនឡើងច្រើនខ្លាំងពេក បានធ្វើឲ្យការប្រមូលពន្ធនៅតំបន់ស្រែអបិលនេះ មានការកើនឡើងលើសពីផែនការរំពឹងទុក ក៏ប៉ុន្តែទន្ទឹមនឹងការកើនឡើងលើសផែនការនេះ មន្ត្រីគយបានឆ្លៀតឱកាសរកស៊ីក្រៅបញ្ជីរដ្ឋ ដោយមានការត្រូវរូវគ្នាជាមួយក្រុមឈ្មួញឈ្មោះ ឡុង ម៉េង យាយរ៉ា និង តា ឈីម ដោយបានប្រើប្រាស់រូបភាពគ្រប់បែបយ៉ាង ដើម្បីបន្លំយថា ប្រភេទមុខទំនិញ ដែលបង់ពន្ធថ្លៃ មកដាក់ទំនិញបង់ពន្ធថោកវិញ ព្រមទាំងបានប្តូរបរិមាណពីច្រើនមកតិច ដែលធ្វើឲ្យការបង់ពន្ធអស់តិច មិនសមាមាត្រ និងចំនួនទំនិញពិត។ ការប្រើរូបភាពបន្លំបែបនេះ បានធ្វើឲ្យក្រុមឈ្មួញ និងមន្ត្រីគយចំណេញទាំងសងខាង និងសល់លុយក្រោមតុសម្រាប់ចែកគ្នាជារៀងរាល់ថ្ងៃ ជាហេតុធ្វើឲ្យប្រាក់ចំណូលរដ្ឋ នៅតែមានកំណើនយឺត និងបាត់បង់ដោយមិនដឹងខ្លួន។
ទាក់ទងនឹងការលេចធ្លាយរឿងមិនល្អនៃការប្រមូលពន្ធក្រៅបញ្ជីនេះ លោក គង់ សំរេច ប្រធានការិយាល័យគយ និងរដ្ឋាករស្រែអំបិល មានប្រសាសន៍ប្រាប់ក្រុមអ្នកសាព័ត៌មាន នារសៀលថ្ងៃទី១៦ មករា ដោយបដិសេធថា លោកពុំដែលបានប្រើរូបភាពប្រមូលពន្ធ ដោយបន្លំ ប្រភេទ និងបរិមាណទំនិញ ដូចការលើកឡើងនេះទេ។ បើសិនជាមានការបន្លំមែនមិនអាចប្រមូលបានលើសផែនការឡើយ៕ ហេង សូរិយា
