សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំៈ រថយន្ត១គ្រឿងដឹកទឹកផ្លែឈើជាច្រើនមុខ ខណៈកំពុងបើកបរតាមបណ្តោយផ្លូវជាតិលេខ៦ ត្រង់ចំណុចភូមិបន្ទាយយោមរាជ ឃុំប្រាសាទ ស្រុកសន្ទុក ខេត្តកំពង់ធំ ស្រាប់តែផ្ទុះឮស្នូរដូចគ្រាប់បែក បង្កឲ្យឆាបឆេះចេញជាអណ្តាតភ្លើ បណ្តាលឲ្យមនុស្សម្នាក់ស្លាប់ និងម្នាក់ទៀតរបួសធ្ងន់ នៅវេលាម៉ោងជិត៥ល្ងាច ថ្ងៃអង្គារ ១៤កើត ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៣០ ខែមករា ឆ្នាំ២០១៨។
ប្រភពព័ត៌មានបានឲ្យដឹងថា មុនពេលកើតហេតុ គេបានឃើញរថយន្ត១គ្រឿង ប្រភេទកូរ៉េខ្លប់ ម៉ាកហ៊ីយ៉ាន់ដាយ ពណ៌សរ ដឹកទឹកផ្លែឈើជាច្រើនមុខ បើកបរក្នុងទិសដៅពីជើងទៅត្បូង ដោយមានធំក្លិនហ្គាស។ ក្រោយមកបន្តិច ស្រាប់តែរថយន្តនោះបានផ្ទុះឆេះចេញជាអណ្តាតភ្លើងយ៉ាងសន្ធោសន្ធៅនៅកណ្តាលផ្លូវ បណ្តាលឲ្យព្រូឡានម្នាក់ត្រូវឆេះស្លាប់ក្នុងបឹងភ្លើង ចំណែកតែកុងរថយន្តរងរបួសធ្ងន់ ត្រូវបានដឹកបញ្ជូនទៅសង្គ្រោះនៅមន្ទីរពេទ្យបង្អែកបារាយណ៍សន្ទុកភ្លាមៗផងដែរ។
ក្រោយកើតហេតុ សមត្ថកិច្ចមូលដ្ឋានបានចុះអន្តរាគមន៍ បាញ់ពន្លត់ និងសម្រួលចរាចរណ៍។ រហូតមកដល់ល្ងាចថ្ងៃដដែល សមត្ថកិច្ចមិនទាន់សន្និដ្ឋានច្បាស់លាស់ នៅឡើយទេថា ការផ្ទុះឆេះនេះ បណ្តាលមកពីអ្វី។ ចំណែកជនរងគ្រោះ ក៏មិនទាន់ស្គាល់អត្តសញ្ញាណនៅឡើយដែរ៕
អត្ថបទ និងរូបភាព៖ គេហទំព័រក្នុងស្រុក
