សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ៥នាក់ ត្រូវបានកម្លាំងកងរាជអាវុធហត្ថខណ្ឌជ្រោយចង្វា សហការជាមួយកម្លាំងកងរាជអាវុធហត្ថរាជធានីភ្នំពេញ ចុះបង្ក្រានករណីជួញដូរ និងចែកចាយគ្រឿងញៀន មួយកន្លែង កាលពីម៉ោងជិត២រសៀល ថ្ងៃពុធ ៧រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៧ ខែកុម្ភៈ ឆ្នាំ២០១៨ ដែលស្ថិតនៅក្នុងរោងកម្មករ ក្នុងបុរីឌឺមេគង្គរ៉ូយ៉ាល ភូមិខ្ទរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យទាំង ៥នាក់ខាងលើដែលត្រូវឃាត់ខ្លួននោះ ទី១-ឈ្មោះ សន វាសនា អាយុ ៣៥ឆ្នាំ ទី២-ឈ្មោះ សុខ ជា អាយុ ២៥ឆ្នាំ ទី៣-ឈ្មោះ ប្រាក់ ទិត្យ អាយុ ២០ឆ្នាំ ទី៤-ឈ្មោះ អៀម រតនា អាយុ ១៨ឆ្នាំ និងទី៥-ឈ្មោះ ធី សីលា អាយុ ២៥ឆ្នាំ បច្ចុប្បន្នអ្នកទាំង ៥នាក់ខាងលើមានមុខរបរ កម្មករសំណង់ស្នាក់នៅភូមិកើតហេតុខាងលើ។
ប្រភពព័ត៌មានពីមន្ត្រីកងរាជអាវុធហត្ថខណ្ឌ បានប្រាប់អោយដឹងថា មុនពេលកម្លាំងកងរាជអាវុធខណ្ឌជ្រោយចង្វាបានសហការជាមួយកម្លាំងកងរាជអាវុធហត្ថរាជធានីភ្នំពេញ បានបើកប្រតិបត្តិការស្រាវជ្រាវរហូតឈានដល់ការឆក់ចូលបង្ក្រាបទីតាំង មួយកន្លែងនៅក្នុងរោងកម្មករ ក្នុងបុរីឌឺមេគង្គរ៉ូយ៉ាល ដោយឃាត់ខ្លួនបានជនសង្ស័យចំនួន ៥នាក់ ដកហូតថ្នាំញៀនចំនួន ៦កញ្ចប់ក្នុងមាន ២កញ្ចប់ធំល្មម ដាវសាំម៉ូរ៉ៃចំនួន ២ដើម ឧបករណ៍ប្រើប្រាស់មួយចំនួន និងម៉ូតូ មួយគ្រឿង ម៉ាក ហុងដាសង់ ស៊េរីឆ្នាំ២០១៥ ភ្នំពេញ 1CQ-8762 ។
បន្ទាប់ពីសាកសួរជនសង្ស័យខាងលើរួចមក កម្លាំងកងរាជអាវុធហត្ថខណ្ឌ បានបញ្ជូនជនសង្ស័យទាំងនោះទៅកាន់ទីបញ្ជាការកងរាជអាវុធហត្ថរាជធានីភ្នំពេញ ដើម្បីកសាងសំណុំរឿងចាត់ការបន្តតាមនីតិវិធី៕ ជ្រោយពេជ្រ
