យុវជន២នាក់ជិះម៉ូតូអកហ្សឺជាមួយរថយន្តចាប់ហ្វ្រាំងបង្ខំដួលសន្លប់ស្តូកស្តឹង

ភ្នំពេញ៖ យុវជន២នាក់ជិះម៉ូតូឌុបគ្នាហើយបានអកហ្សឺជាមួយរថយន្តមួយគ្រឿង នៅខាងមុខ ក៏បានចាប់ហ្វ្រាំងទាំងបង្ខំបណ្តាលឲ្យដួលបោកក្បាលទៅនឹងថ្នល់សន្លប់ស្តូកស្តឹង ។

ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ ថ្ងៃព្រហស្បតិ៍ ១៥កើត ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១ ខែមីនា ឆ្នាំ២០១៨ នៅចំណុចមុខច្រកចូលវត្តដំបូកខ្ពស់ តាមបណ្តោយផ្លូវលេខ៣៧១ ស្ថិតក្នុងសង្កាត់បឹងទំពុន២ ខណ្ឌមានជ័យ រាជធានីភ្នំពេញ។

តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញយុវជន២នាក់ជិះម៉ូតូម៉ាកfino ពណ៍ស ពាក់ស្លាកលេខ ភ្នំពេញ 1CB 4238 ធ្វើដំណើរតាមបណ្តោយផ្លូវលេខ៣៧១ក្នុងទិសដៅពីលិចទៅកើតខណះមកដល់ចំណុចកើតហេតុស្រាប់តែអកហ្សឺជាមួយរថយន្តNisan មួយគ្រឿងដែលបើកខាងមុខទើបចាប់ហ្វ្រាំងទាំងបង្ខំ បណ្តាលឲ្យដួលបោកក្បាលទៅនឹងថ្នល់រងរបួសសន្លប់ស្តូកស្តឹង មួយសន្ទុះក្រោយមក ទើបដឹងខ្លួនហើយបានលើកម៉ូតូជិះទៅផ្ទះដោយមិនព្រមឡើងឡានពេទ្យទៅសង្គ្រោះនោះទេ ៕ សុខាសែនជ័យ