បុរសម្នាក់រងរបួសធ្ងន់ ខណៈបើករថយន្តលឿនមិនប្រយ័ត្នបុករបាំងថ្មពុះចែកទ្រូងផ្លូវទាំងកម្រោល

ភ្នំពេញ៖ រថយន្តកាម៉ារីឆ្លាមមួយគ្រឿង សង្ស័យម្ចាស់ស្រវឹងបើកបរក្នុងល្បឿនលឿនក៏ជ្រុលទៅបុករបាំងក្បាលនាគចែកទ្រូងផ្លូវ នៅស្តុបផ្លូវបែកជាបួន បណ្តាលអ្នកបើកបររងរបួសធ្ងន់ ហើយរថយន្តខ្ទេចមួយកំណាត់មុខទៅលែងរួច ។

ករណីគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៣និង១០នាទីទៀបភ្លឺ ឈានចូលថ្ងៃសៅរ៍ ២រោច ខែផល្គុន ឆ្នាំរការ នព្វស័ក ពស២៥៦១ ត្រូវនឹងថ្ងៃទី៣ ខែមីនា ឆ្នាំ២០១៨ ស្ថិតនៅចំណុចមុខសណ្ឋាគារឡុងបិចផ្លាហ្សា តាមបណ្តោយផ្លូវលេខ២៨៩ កែងនិងផ្លូវលេខ៥២៨ សង្កាត់បឹងកក់១ ខណ្ឌទួលគោក រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុ គេឃើញបុរសម្នាក់បើករថយន្តមួយគ្រឿងម៉ាកកាមរីឆ្លាម ពណ៌ទឹកប្រាក់ ពាក់ស្លាកលេខ ភ្នំពេញ 2T-9707 បើកបរតាមបណ្តោយផ្លូវលេខ២៨៩ ទិសដៅពីជើងទៅត្បូង លុះមកដល់ចំណុចកើតហេតុខាងលើបានរេចង្កូតទៅបុកក្បាលនាគចែកទ្រូវផ្លូវពេញទំហឹង បណ្តាលខ្ទេចមួយកំណាត់ និងផ្ទុះពោង ខូចខាតយ៉ាងដំណំទៅមុខលែងរួច ។ ចំណែកអ្នកបើករថយន្តបង្ក បានរងបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗផងដែរ ។

ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកវាស់វែងយករថយន្តបង្កទៅរក្សាទុកនៅការិយាលយ័ចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នាទៅតាមនីតិវិធី ៕ស តារា