សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ហេតុការណ៍ភ្ញាក់ផ្អើលមួយ បន្ទាប់ពីបុរសជនជាតិចិនម្នាក់ បានយកដែកវាយជញ្ជាំងផ្ទះខ្មែរលក់ស៊ុប បណ្ដាលឲ្យក្រពឹតជញ្ជាំងស័ង្កសី ហើយស្ទុះទៅវាយអ៊ុំប្រុសលក់ស៊ុបចំនួន២ដៃ ព្រោះតែខឹងលក់ស៊ុប និងគ្រឿងក្លែម មិនសូវមានភ្ញៀវចូលហូប ហើយខឹងខ្មែរលក់ស៊ុបដាច់ជាង។
ហេតុការណ៍នេះបានកើតឡើងកាលពីវេលាម៉ោង០៦និង៣០នាទីយប់ ថ្ងៃអាទិត្យ ៣រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៤ ខែមីនា ឆ្នាំ២០១៨ នៅមុខភោជនីយដ្ឋាន សុខធា តាមបណ្ដោយផ្លូវវិមានសព កែងផ្លូវសហព័ន្ធរុស្ស៊ី ភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ ។
ប្រភពព័ត៌មានបានឲ្យដឹងថា ជនរងគ្រោះជាជនជាតិខ្មែរបានបើកភោជនីយដ្ឋាន យីហោ សុខធា មានលក់បាយមាន់ គុយទាវ សាច់គោអាំង និងម្ហូបគ្រប់មុខ ។ ចំណែកជនបង្កជាជនជាតិចិន ជាម្ចាស់ហាងយីហោ អួងជែឡូអ៊ី លក់ម្ហូបចិនគ្រប់មុខ ដោយហាងទាំង២គឺបើកនៅជិតគ្នា ។
ប្រភពព័ត៌មាន បានឲ្យដឹងថា នៅមុនពេលកើតហេតុ ខណៈម្ចាស់ហាងខ្មែរកំពុងលក់ ស្រាប់តែបុរសជនជាតិចិនដែលថៅកែហាងជាប់គ្នានោះ យកដែកវាយជញ្ជាំងស័ង្កសី ដែលបាំងព្រំប្រទល់ផ្ទះគាត់ បណ្ដាលឲ្យក្រពឹត បន្ទាប់មកម្ចាស់ហាងខ្មែរ ក៏ស្រែកសួរនាំ ស្រាប់តែឃើញបុរសជនជាតិចិនខាងលើ ស្ទុះទៅវាយម្ចាស់ហាងជនជាតិខ្មែរចំនួន២ដៃ ហើយស្ទុះរកវាយក្រុមគ្រួសារអ៊ុំប្រុសម្ចាស់ហាងខាងលើ តែសំណាងល្អ អ្នករត់ម៉ូតូឌុប និងប្រជាពលរដ្ឋធ្វើដំណើរឃើញទាន់ ហើយជួយអន្តរាគមន៍ភ្លាមៗផងដែរ បន្ទាប់មករត់ចូលក្នុងផ្ទះបាត់ ហើយចាក់សោទៀតផង ។
ប្រភពបានបន្តទៀតថា មួយសន្ទុះក្រោយមក ទើបនគរបាលប៉ុស្តិ៍កាកាប២ និងនគរបាលចេះភាសាចិនមកឃាត់ខ្លួនបុរសជនជាតិចិនខាងលើ យកទៅប៉ុស្តិ៍នគរបាលរដ្ឋបាលកាកាប២ ដើម្បីសាកសួរ ។ ពេលនគរបាលប៉ុស្តិ៍ និងនគរបាលចេះភាសាចិនសួរនាំ ជនជាតិចិនខាងលើបានសាភាពថា ខ្លួនបានវាយជញ្ជាំងស័ង្កសីភាគីខាងលើមែន ព្រោះខឹងម្ចាស់ហាងខ្មែរលួចធ្វើម្ហូបតាមគាត់ ដោយលួចតាមអ៊ីនធើណេត (អាខោន) ។
បើតាមម្ចាស់ហាងជនជាតិខ្មែរ បានបញ្ជាក់ទៀតថា ហាងគាត់បានបើកប្រមាណ៦ឆ្នាំមកហើយ គឺគាត់លក់ម្ហូបដដែលនឹង ហើយជនជាតិចិនខាងលើ ទើបនឹងមកនៅបានប្រមាណមួយឆ្នាំតែប៉ុណ្ណោះ ។ ក្រោយពេលកើតហេតុ ជនរងគ្រោះជនជាតិខ្មែរបានបានទាមទារសំណងចំនួន១,០០០ដុល្លារ ថ្លៃជំងឺចិត្ត រួចឲ្យសមត្ថកិច្ចអប់រំ តែជនជាតិចិនមិនព្រមសង សមត្ថកិច្ចបានឃាត់ខ្លួនបុរសជនជាតិចិនខាងលើបញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យ ភ្លាមៗផងដែរ ៕ សុខាសែនជ័យ
