សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ បានធ្វើសកម្មភាពលួចម៉ូតូមួយគ្រឿងបានសម្រេច ហើយព្យាយាមបើករត់គេចខ្លួនលុះមកដល់ចំណុចភ្លើងស្តុបក៏ឈប់ចាំភ្លើងសញ្ញា ភ្លាមនោះជនរងគ្រោះជិះដេញតាមទាន់ចាប់បានប្រគល់ឲ្យសមត្ថកិច្ចចាត់ការតាមច្បាប់ ។
ករណីចោរលួចខាងលើនេះ បានកើតឡើងនៅម៉ោង៧និង៣០នាទីព្រឹកថ្ងៃចន្ទ ៤រោច ខែផល្គុន ឆ្នាំរកា នព្វស័ក ព.ស២៥៦១ ត្រូវនឹង ថ្ងៃទី៥ ខែមីនា ឆ្នាំ២០១៨ នៅចំណុចមុខផ្ទះជួលលក់ទូរសព្ទដៃ ផ្លូវជាតិលេខ១ ភូមិកណ្តាល សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។
សមត្ថកិច្ចបានឲ្យដឹងថា ជនរងគ្រោះមានឈ្មោះ ម៉ៅ លីកា ភេទប្រុស អាយុ២៧ឆ្នាំ មុខរបរជាងជុសជុលទូរសព្ទដៃ ស្នាក់នៅផ្ទះគ្មានលេខ ភូមិតាឡី សង្កាត់ដង្កោ ខណ្ឌដង្កោ។ ចំណែកជនសង្ស័យឈ្មោះ សេង ម៉ាប់ ភេទប្រុស អាយុ២៧ឆ្នាំ មុខរបរ មិនពិតប្រាកដ ស្នាក់នៅផ្ទះជួល សង្កាត់ទន្លេបាសាក់ ខណ្ឌចំការមន (ប្រើប្រាស់គ្រឿងញៀន៣ខែមកហើយ) ។
យោងតាមប្រភពព័ត៌មានពីសមត្ថកិច្ចខណ្ឌច្បារអំពៅ បានឲ្យដឹងថា មុនពេលកើតហេតុ ជនរងគ្រោះបានទុកម៉ូតូមួយគ្រឿងម៉ាកស្កុបពី ពណ៌ក្រហមលាយស ពាក់ស្លាកលេខ ភ្នំពេញ1BE-8403 នៅចំណុចកើតហេតុខាងលើ ដោយចាក់សោ.កម៉ូតូត្រឹមត្រូវ រួចដើរចូលទៅក្នុងផ្ទះ ស្រាប់តែជនសង្ស័យបានធ្វើសកម្មភាពលួចយកម៉ូតូជនរងគ្រោះជិះគេចខ្លួនមកដល់ភ្លើងស្តុបច្រមុះជ្រូកក្បាលថ្នល់ ផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន ក៏ត្រូវបានជនរងគ្រោះជិះម៉ូតូដេញតាមទាន់ស្រែកចោរៗ នាំគ្នាចាប់បានជនសង្ស័យ រួមនិងម៉ូតូមកវិញប្រគល់ឲ្យសមត្ថកិច្ចចាត់ការតាមច្បាប់តែម្តង ។
បច្ចុប្បន្នជនសង្ស័យខាងលើ ត្រូវបានសមត្ថកិច្ចឃាត់ខ្លួនបណ្ដោះអាសន្ននៅកាន់អធិការដ្ឋាននគរបាលខណ្ឌច្បារអំពៅ ដើម្បីកសាងសំណុំរឿងចាត់ការតាមច្បាប់ ៕ស តារា
