សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ យ៉ាងតិចមានរថយន្តប្រភេទកាមរីហើម កម្មរីបាឡែន ប្រមាណជា១០គ្រឿង បានរៀបចំលើកឈើគ្រញូងដាក់ នៅចំណុចផ្ទះរបស់ឈ្មួញឈើគ្រញូង (ពៅ) ស្ថិតក្នុងភូមិអណ្តូងសំបួរ ឃុំស្នាមព្រះ ស្រុកបាកាន ខេត្តពោធិ៍សាត់ តាមគម្រោងឈើទាំងនេះ ត្រៀមចេញមកកាន់រាជធានីភ្នំពេញ នាយប់ថ្ងៃអាទិត្យ ១០រោច ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១១ ខែមីនា ឆ្នាំ២០១៨ ប្រហែលជា១៨តោន បន្ទាប់ពីឈ្មួញឈើគ្រញូងឈ្មោះ ពៅ នេះ បានប្រមូលយកមកទុកតាំងពីម៉ោងរំលងអធ្រាត្រ ថ្ងៃសៅរ៍ ២ រោច ខែផល្គុន ឆ្នាំរកា ពន្វស័ក ព.ស ២៥៦១ ត្រូវនឹងថ្ងៃទី៣ ខែមីនា ឆ្នាំ២០១៨កន្លងទៅ ។
ប្រភពគួរឲ្យជឿទុកចិត្តបានបង្ហើបថា ឈ្មួញឈ្មោះ ពៅ បានរត់ការចាត់ចែង ឲ្យអាជ្ញាធរ សមត្ថកិច្ចជំនាញជាច្រើនស្ថាប័នរួចមកហើយ ហើយឈើទាំងនោះ នឹងដឹកចេញយប់នេះពីផ្ទះឈ្មោះ ពៅ ស្ថិតក្នុងភូមិអណ្តូងសំបួរ ឃុំស្នាមព្រះ ស្រុកបាកាន ខេត្តពោធិ៍សាត់ ។
ប្រភពដដែលនេះបានបញ្ជាក់យ៉ាងលម្អិតថា ឈើគ្រញូងទាំងនោះមួយចំនួនធំ បានប្រមូលពីចំណុចឃុំ អូរសោង ស្រុកវាលវែងមកស្តុកទុកនៅផ្ទះរបស់ឈ្មួញឈ្មោះ ពៅ នេះកាលពីយប់ម្សិលមិញផងដែរ ។
សមត្ថកិច្ចជាច្រើនស្ថាប័ន ប៉ុន្មានថ្ងៃនេះ រួមទាំងអាជ្ញាធរផងដែរ ត្រូវបានគេទទួលស្គាល់ថា បានយកចិត្តទុកដាក់ពង្រឹងទប់ស្កាត់ ការដឹកជញ្ជួនឈើល្មើសច្បាប់ ទាំងឈើក្រហម អារប្រភេទលេខ២ ឈើធ្នង់ និងឈើរាជ្យកុល ក៏ដូចជារថយន្តយីឌុបធំៗដឹកអុសឈើស្រស់ៗនេះជាដើម ។
ស្របពេលការទប់ស្កាត់សកម្មភាពតាមឡានយីឌុប បែរជាយប់នេះ ឈ្មួញឈើគ្រញូងឈ្មោះ ពៅ រត់ការជាមួយសមត្ថកិច្ចអាជ្ញាធរជំនាញជាច្រើនស្ថាប័ន ដើម្បីនាំឈើទាំងនោះពីឃុំស្នាមព្រះ ស្រុកបាកាន ចូលមកកាន់រាជធានីភ្នំពេញ ដូច្នេះ សមត្ថកិច្ចដែលពុំទាន់បានទទួលផលប្រយោជន៍ក្នុងករណីនេះ គួរមានវិធានការតាមដានពីសកម្មភាពដែលត្រៀមនឹងដឹកឈើគ្រញូងចេញនេះ ខណៈសមត្ថកិច្ចអាជ្ញាធរ ជំនាញមួយចំនួន គាត់អាចនឹងទទួលទានដំណេកមុន ដើម្បីទុកឱកាសឲ្យឈ្មួញឈើគ្រញូងឈ្មោះ ពៅ ដឹកជញ្ជូនឈើប្រមាណជា១៨តោននេះឲ្យរលូន ប៉ុន្តែគេហ៊ានអះអាងថា ក្បួនឈើគ្រញូងរបស់ឈ្មួញឈ្មោះ ពៅ អាចនឹងចេញនាពេលបន្តិចទៀតនេះយ៉ាងយូរត្រឹមម៉ោង១០យប់ ហើយឆ្ពោះមកខេត្តកំពង់ឆ្នាំង ខណៈករណីនេះ ត្រូវបានរត់ការតាំងពីខេត្តពោធិ៍សាត់ ខេត្តកំពង់ឆ្នាំង ខេត្តកំពង់ស្ពឺ ខេត្តកណ្តាល និងសមត្ថកិច្ចមួយចំនួនទៀតនៅរាជធានីភ្នំពេញ ៕
