សារព័ត៌មាន នគរវត្ត តែងតែនាំមុខគេជានិច្ច
ក្រុងព្រះសីហនុ៖ សមត្ថកិច្ចនគរបាលចរាចរណ៍ខេត្តព្រះសីហនុ បានចុះអន្តរាគមន៍ភ្លាមៗដើម្បីបញ្ចៀសការកកស្ទះចរាចរណ៍ នៅចំណុចឃ្លាំងលើ សង្កាត់លេខ១ ក្រុងព្រះសីហនុ ក្រោយមានរថយន្តធំ២គ្រឿងប៉ះគ្នា ប៉ុន្តែមិនបណ្ដាលឲ្យមានមនុស្សរងរបួសនោះទេ ។
បើតាមសមត្ថកិច្ចបញ្ជាក់ថា គ្រោះថ្នាក់ចរារណ៍នេះកើតឡើង កាលពីវេលាម៉ោង៤រសៀលថ្ងៃអង្គារ ៤កើត ខែចេត្រ ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី២០ ខែមីនា ឆ្នាំ២០១៨ រវាងរថយន្តម៉ាក HINO លេខ ភ្នំពេញ3C-9123 សណ្តោងរុឺម៉កលេខ ព្រះសីហនុ 4A-0930 កម្មសិទ្ធិឯកជន ដឹកខ្សាច់ មានទិសដៅចូលក្រុង បើកបរដោយឈ្មោះ ខន សៅលិញ ភេទប្រុស អាយុ ២៩ឆ្នាំ មុខរបរ បើកបរ ទីលំនៅភូមិចំបក់រុន្ធជើង ឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ ជាមួយរថយន្តបែនដឹកដី ម៉ាក MIGHTY II ២តោនកន្លះ គ្មានស្លាកលេខ ដែលបត់ឆ្លងផ្លូវទៅខាងស្តាំដៃ ក្នុងទិសដៅស្របគ្នា អ្នកបើកបរ ឈ្មោះ សៀក តុលា ភេទប្រុស អាយុ ២៩ឆ្នាំ មុខរបរ បើកបរ មានទីលំនៅ ភូមិដូង ឃុំបាបោង ស្រុកពាមរក៏ ខេត្តព្រៃវែង ។
ករណីនេះ ក្រោយកើតហេតុ ភាគីទាំងសងខាងបានសម្របសម្រួលគ្នាដោយសន្តិវិធីហើយ ៕ ឆ្លាម សមុទ្រ
