សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីកូនស្រីម្ចាស់ផ្ទះសំណាក់ ហូលីដេរ ត្រូវបុគ្គលិកចាប់រំលោភបានសម្រេចរយះពេល២ថ្ងៃ ទើបបែកការនោះ ឥឡូវសមត្ថកិច្ចបញ្ជួនជនល្មើសទៅតុលាការហើយបន្ទាប់ពីបញ្ចប់នីតិវិធីសាកសួរកាលពីព្រឹក ថ្ងៃអង្គារ ១១កើត ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៧ ខែមីនា ឆ្នាំ២០១៨ ។
សូមរំលឹកថាកាលពីព្រឹកថ្ងៃ សៅរ៍ ៨ កើត ខែ ចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី ២៤ ខែ មីនា ឆ្នាំ ២០១៨ នៅចំណុចផ្ទះសំណាក់យីហោ ហូលីដេរ ស្ថិតនៅភូមិស្លែងរលើង សង្កាត់អូបែកក្អម ខណ្ឌសែនសុខ មានករណីកូនស្រីបង្កើតម្ចាស់ផ្ទះសំណាក់ ហូលីដេរ ត្រូវបុគ្គលឹករបស់ខ្លួនចាប់រំលោភបានសម្រេចចំនួនមួយលើកពេលដែលឪពុកម្តាយមិននៅផ្ទះបានរយះពេល២ថ្ងៃទើបបែកការទើបឪពុកនារីរងគ្រោះចាប់ជនល្មើសយកមកប្រគល់ឲ្យសមត្ថកិច្ច។
ជនសង្ស័យឈ្មោះ ផល ណាផា ភេទប្រុស អាយុ២០ឆ្នាំ មុខរបរជាអ្នកគិតលុយ ក្នុងផ្ទះសំណាក់ ហូលីដេរ និងស្នាក់នៅកន្លែងធ្វើការ បន្ទប់លេខ ១A ជាន់ផ្ទាល់ដី មានស្រុកកំណើត ភូមិកំពង់លាវ ឃុំលេខ២ ស្រុកកំពង់លាវ ខេត្តព្រៃវែង ។ ចំណែកនារីរងគ្រោះមានឈ្មោះ (ល.ស.ដ.ន) អាយុ១៥ឆ្នាំ ។
ពាក្យបណ្តឹងរបស់នារីរងគ្រោះ បានឲ្យដឹងថា នៅមុនថ្ងៃកើតហេតុកន្លងមក នាងតែងតែដើរទៅគោះបន្ទប់ជនសង្ស័យ ដើម្បីសុំខ្ចីទូរស័ព្ទដៃមកលេងហ្គេម លុះដល់ថ្ងៃទី២២ ខែមីនា ឆ្នាំ២០១៨ រូបនាងបានដើរទៅខ្ចីទូរស័ព្ទពីជនសង្ស័យម្តងទៀត ដោយថ្ងៃនោះ ឪពុកម្តាយរបស់នាងមិននៅផ្ទះទេ គឺទៅខេត្តបាត់ដំបង។
នាងបន្តទៀតថា នៅថ្ងៃដដែលនោះ នាងក៍ដើរទៅគោះទ្វារបន្ទប់ជនសង្ស័យក្នុងបំណងខ្ចីទូរស័ព្ទមកលេងហ្គេមដូចលើកមុន ពេលនោះ ស្រាប់តែជនសង្ស័យបានទាញដៃនាងចូលទៅក្នុងបន្ទប់ហើយធ្វើសកម្មភាពចាប់សម្រាតខោអាវនាងហើយរំលោភតែម្តង ពេលនោះ នាងខំរើបម្រាសដែរ តែរើមិនរួច ។
នារីរងគ្រោះបន្តថា នៅពេលដែលជននេះធ្វើសកម្មភាពរួច នាងក៌ស្លៀកសម្លៀកបំពាក់ដើរចេញមកខាងក្រៅ ពេលនោះជនសង្ស័យបានដើរមកកន្លែងនាងអង្គុយ ហើយនាងក៏និយាយថា ចាំមើល៍ ខ្ញុំប្រាប់ឪពុកម្តាយខ្ញុំ! ពេលនោះ ជនសង្ស័យឈ្មោះ ផល ណាផា បានប្រាប់នាងថា កុំប្រាប់គាត់អី បើប្រាប់គាត់បានអីមកវិញ យ៉ាងច្រើនបានត្រឹមជាប់គុកហ្នឹង ។
រហូតមកដល់ថ្ងៃសៅរ៍ ៨កើត ខែចេត្រ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២៤ ខែមីនា ឆ្នាំ២០១៨ នារីរងគ្រោះ ក៏បានប្រាប់ពីដំណើររឿងឲ្យឪពុកម្តាយដឹង ហើយឪពុកនាងបាននាំខ្លួនជនសង្ស័យយកមកប្រគល់ឲ្យសមត្ថកិច្ចសាកសួរតែម្តង។
តាមចម្លើយសារភាពរបស់ជនសង្ស័យប្រាប់សមត្ថកិច្ចថា ខ្លួនពិតជាបានធ្វើសកម្មភាពរំលោភលើនារីរងគ្រោះពិតប្រាកដមែន បានសម្រេចចំនួនមួយលើក ប៉ុន្តែគ្មានការបង្ខិតបង្ខំទេ ។
បច្ចប្បន្នជនសង្ស័យត្រូវនគរបាលខណ្ឌសែនសុខបញ្ជួនទៅតុលាកាចាត់បន្តតាមនីតិវិធី ៕ តុង សីហា
