សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ទំនាស់រឿងដីធ្លីរបស់បងប្អូនបានអូសបន្លាយពេលរាប់ឆ្នាំ តែទីបំផុតតុលាការកំពូលសម្រេចជាស្ថាពរឲ្យភាគីបងស្រីជាអ្នកឈ្នះក្តី ។ នេះជាការសម្រេចបិទផ្លូវតវ៉ា និង ប្រគល់ដីធ្លីឲ្យម្ចាស់បំណុលគ្រប់គ្រង ។
គណៈកម្មការចម្រុះ ដឹកនាំដោយលោកយឹម កេតធី អាជ្ញាសាលានៃអយ្យការអមសាលាដំបូងខេត្តកណ្ដាល នៅថ្ងៃទី២៨ ខែមីនា ឆ្នាំ២០១៨ ចុះអនុវត្តសាលដីកាលេខ២៤៧ “ឆ”ចុះថ្ងៃទី២៥ ខែសីហា ឆ្នាំ២០១៧ របស់តុលាការកំពូល ដែលមានទីតាំងស្ថិតនៅភូមិកោះរះក្រោម ឃុំកោះរះ ស្រុកល្វាឯម ខេត្តកណ្ដាល ដែលមានកូនបំណុលនៃការអនុវត្តឈ្មោះ ហង់ រ៉េត (ស្លាប់) ឈ្មោះ ខាត់ ចំរើន និង ឈ្មោះ សឿរ សោភា ។
លោកយឹម កេតធី អាជ្ញាសាលានៃអយ្យការអមសាលាដំបូងខេត្តកណ្ដាល ថ្លែងថា ខ្លឹមសារនៃការអនុវត្តគឺ រុះផ្ទះ និង រើសម្ភារៈ ផ្សេងៗចេញពីដីដែលមានប័ណ្ណសម្គាល់សិទ្ធិកាន់កាប់ប្រើប្រាស់ដីធ្លីលេខH4-0285 ចុះថ្ងៃទី០៤ ខែកញ្ញា ឆ្នាំ១៩៩២ ។
ការអនុវត្តនេះទៀតសោត គឺ ធ្វើដោយការស្ម័គ្រចិត្តរបស់កូនបំណុល ដែលព្រមរុះរើដោយខ្លួនឯង តាមការសន្យានាពេលកន្លងមក ។
ជាការកត់សម្គាល់ មុនពេលអនុវត្តសាលដីកាតុលាការកំពូល ភាគីចាញ់ក្តីហាក់បង្កការលំបាកដល់គណៈកម្មការចម្រុះ ។ ប៉ុន្ដែក្រោយមានការសម្របសម្រួលនោះ សាលដីកានេះ ត្រូវបានអនុវត្តបញ្ចប់ជាស្ថាពរដោយពុំមានអំពើហិង្សាណាមួយ កើតឡើងឡើង ៕ ឆ ដា
