តារាចម្រៀងប្រចាំផលិតកម្មថោនម្នាក់ប្រកាសលក់ផ្ទះវីឡាយកលុយព្យាបាលអ្នកមានគុណ

ភ្នំពេញ៖ អ្នកគាំទ្រ និងក្នុងចង្កោមអ្នកសិល្បៈមានការភ្ញាក់ផ្អើលខ្លាំងបន្ទាប់ពីតារាចម្រៀង ប្រចាំផលិតកម្មថោន លោក ករុណា ពេជ្រ បានប្រកាសលក់ផ្ទះវីឡាស្កឹមស្កៃ ដើម្បីយកប្រាក់ព្យាបាលជំងឺឪពុករបស់ខ្លួននៅក្រៅប្រទេស ។ ការប្រកាសនេះ ធ្វើឡើងក្រោយពីស្ថានភាពជំងឺរបស់ឪពុកលោក នៅមិនទាន់បានធូរស្រាលនោះ ។

ក្នុងចំណោមតារាចម្រៀងក្នុងផលិតកម្មថោន លោក ករុណា ពេជ្រ ត្រូវបានគេដឹងថា ជាតារាចម្រៀងម្នាក់ ដែលមានមុខតំណែង ការងារ មុខរបរ និងទ្រព្យធនច្រើនជាងគេ ។ ប៉ុន្តែពេលនេះ លោកបែរជាប្រកាសលក់ទ្រព្យធំមួយ គឺផ្ទះវីឡាដែលលោកធ្លាប់បានរស់នៅទីនេះជិត១០ឆ្នាំមកហើយនោះ។ ផ្ទះវីឡានេះត្រូវបានគេដឹងថា នៅបុរីពិភពថ្មីជិតវត្តសំរោងអណ្តែត និងមានតម្លៃជាងកន្លះលានដុល្លារអាមេរិក ។ ទោះបីជាប្រកាសលក់ផ្ទះវីឡាប្រណីតនេះក្តី ក៏លោកមិនបញ្ជាក់អំពីតម្លៃដែលលក់នោះដែរ ។ អ្វីដែលគេចាប់អារម្មណ៍ គឺពាក្យថ្លែងសរសើរពីអ្នកគាំទ្រលោក ដែលមានភាពកត្តញ្ញូខ្លាំងក្លាចំពោះអ្នកមានគុណ ។ តារារូបនេះ ក៏ទទួលបានសារលើកទឹកចិត្តជាច្រើន ពីអ្នកគាំទ្រ និងអ្នកសិល្បៈដូចគ្នាផងដែរ។

គួរបញ្ជាក់ដែរថាបន្ទាប់ពីប្រឡូកក្នុងរយៈពេលខ្លីក្នុងផលិតកម្មថោន តារាចម្រៀង ករុណាពេជ្រ ទទួលបានការគាំទ្រច្រើន ទើបលោកសម្រេចចិត្តទិញផ្ទះវីឡាប្រណីតមួយនេះ រួមជាមួយពិធីឡើងគេហដ្ឋានយ៉ាងគគ្រឹកគគ្រេង។ លោកក៏ទទួលបានតំណែងជាអ្នកគ្រប់គ្រងទូទៅឲ្យផលិតកម្ម និងក្លឹបកម្សាន្តថោនផងដែរ មុនពេលដែលលោកត្រូវបានផ្លាស់ទៅគ្រប់គ្រងផ្សារ Container និង Pub Street ដែលទើបបើកដំណើរការនៅខេត្តសៀមរាបកាលពីពេលថ្មីៗនេះ ៕ វឌ្ឍនា