សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ ភ្លៀងមួយមេលាយឡំជាមួយខ្យល់កន្ត្រាក់នឹងផ្លេកបន្ទោ ធ្វើឲ្យរបើកដំបូលផ្ទះ ហើយក៏មានរន្ទះបាញ់ ត្រូវឳឪពុក និងកូនបណ្តាលឱ្យរងរបួសធ្ងុន់ បានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្ត ។
ហេតុការណ៍នេះកើតឡើង នៅវេលាម៉ោង៤និង៤៥នាទី ថ្ងៃពុធ ១១កើត ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែមេសា ឆ្នាំ២០១៨ នៅចំណុចផ្ទះជនរងគ្រោះ ម្តុំជិតផ្លូវបំបែកចូលឃុំអូរស្វាយ ខាងក្រោយសាលារៀនរិទ្ធីសែនជ័យ២ ភូមិកំផាន់ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង ។
តាមការឲ្យដឹង ពីស្មៀនសង្កាត់សាមគ្គី ក្រុងស្ទឹងត្រែងឱ្យដឹងថា នៅយប់ថ្ងៃទី ២៥ ខែមេសា ឆ្នាំ២០១៨ថា ជនរងគ្រោះជាឪពុកឈ្មោះ វ៉ាន់ថា អាយុ៤៧ឆ្នាំ ជាកសិករ កូនឈ្មោះ ថា គីស អាយុ១៤ឆ្នាំ ជាសិស្ស រស់នៅភូមិកំផាន់ សង្កាត់សាមគ្គី ក្រុងស្ទឹងត្រែង បច្ចុប្បន្នត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្ត។
មុនពេលកើតហេតុ មេឃធ្លាក់ភ្លៀងហើយមានខ្យល់ បានធ្វើឲ្យរបើកដំបូលផ្ទះ ឃើញដូច្នោះជនរងគ្រោះទាំង២ នាក់ ឪពុកនិងកូន ក៏កាន់ស័ង្កសីដើម្បីប្រក់ផ្ទះឡើងវិញ។ មួយរំពិចនោះ ស្រាប់តែផ្លេកបន្ទោភ្លែតៗ រន្ទះបាញ់តែម្តង ធ្វើឲ្យអ្នកទាំងពីរដួលសន្លប់ភ្លាមៗនៅនឹងកន្លែងកើតហេតុ ។
បច្ចុប្បន្នជនរងគ្រោះទាំង២នាក់ ក្រោយពេលកើតហេតុ ភ្លាមៗត្រូវបានក្រុមគ្រួសារនាំមកមន្ទីរពេទ្យបង្អែកខេត្តដើម្បីសង្គ្រោះបន្ទាន់ និងបានដឹងខ្លួនវិញហើយ ៕ មាស សុផាត
