រថយន្តបុកម៉ូតូផ្លោង១៥ម៉ែត្រ រួចបុកបង្គោលភ្លើងបាក់មួយដើមរបួសធ្ងន់២នាក់

ភ្នំពេញៈ បុរសម្នាក់ទំនងជាស្រវឹងស្រា បានបើករថយន្តលឿងដូចហោះ រួចជ្រុលទៅបុកម៉ូតូមួយគ្រឿង បណ្ដាលឲ្យបុរស២នាក់ រងរបួសធ្ងន់ ហើយរថយន្តបន្តទៅបុកទ្រូងផ្លូវ និងបង្គោលភ្លើងបាក់១ដើមទើប រថយន្តក្រឡាប់ពីរ-បីត្រឡប់ ធ្វើឲ្យអ្នកបើកបររងរបួសស្រាល។

គ្រោះថ្នាក់ចរាចរណ៍ដ៏រន្ធត់នេះ កើតឡើងនៅវេលាម៉ោង១និង៣០នាទីរំលងអធ្រាត្រឈានចូលថ្ងៃ ចន្ទ ១រោចខែ ពិសាខ ឆ្នាំ ច សំរឺត្ធិស័ក ព.ស.២៥៦២ ត្រូវនឹងថ្ងៃទី៣០ ខែមេសា ឆ្នាំ២០១៨ ស្ថិតតាមបណ្ដោយផ្លូវវេងស្រេង ត្រង់ចំណុចភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ។

សាក្សីបានប្រាប់ឲ្យដឹង ថា មុនពេលកើតហេតុ គេឃើញបុរសម្នាក់បើករថយន្តកាមរីបាឡែន ពណ៌ស្ករ ពាក់ស្លាកលេខភ្នំពេញ 2X-4594 បើកពីលិចទៅកើតក្នុងល្បឿនដូចហោះ ខណៈមកដល់ចំណុចកើតហេតុខាងលើ បានជ្រុលទៅបុកម៉ូតូស៊ុយហ្ស៊ុយគីស្មាស់រ៉េវ៉ូ ពណ៌ខៀវពាក់ស្លាក់លេខភ្នំពេញ 1P-8224 ជិះដោយយុវជនពីរនាក់ធ្វើដំណើរស្របគ្នាពេញទំហឹង បណ្ដាលឲ្យម៉ូតូផ្លោងប្រហែល១៥ម៉ែត្ររងរបួសធ្ងន់ ហើយរថយន្តរេចង្កូតហោះទៅបុកទ្រូងផ្លូវ និងបង្គោលភ្លើងបំភ្លឺផ្លូវបាក់១ដើម ព្រមទាំងស្លាកចរារណ៍មួយដើមទៀត ហើយរថយន្តក្រឡាប់ពីរទៅបីត្រឡប់ រងការខូចខាតស្ទើរទាំងស្រុង។ ភ្លាមៗនោះអ្នករងរបួស ត្រូវបានរថយន្តគ្លីនិកឯកជនដឹកយកទៅសង្គ្រោះ។

ប្រភពដដែលបានឲ្យដឹងទៀតថាក្រោយកើតហេតុសមត្ថកិច្ចមូលដ្ឋានទាក់ទងសមត្ថកិច្ចជំនាញផ្នែកចរាចរណ៍មកវាស់វែង និងស្ទូចយករថយន្តបង្ក និងម៉ូតូរងគ្រោះទៅរក្សាទុកនៅការិយាល័យនគរបាលចរាចរណ៍ផ្លូវគោក រាជធានីភ្នំពេញ ដើម្បីរង់ចាំដោះស្រាយតាមច្បាប់ពេលក្រោយ ៕ ប្រាថ្នា