សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ផ្ទុះក្បាលគ្រាប់៦០ មីល្លីម៉ែត្រ ១គ្រាប់បណ្តាលឲ្យស្លាប់បុរស១នាក់នៅកន្លែងកើតហេតុចំណែកបុរស១នាក់ទៀតទទួលរងរបួសធ្ងន់ខណៈដែលជនរងគ្រោះបានយកក្បាលគ្រាប់ ប្រភេទ៦០ មីល្លីម៉ែត្រ ដែលបន្សល់ទុកពីសម័យសង្រ្គាមទៅវាយដំដោះប្រលូញកន្លឹះរ៉ឺម៉កគោយន្តចេញពីគោយយន្តដើម្បីយកទៅភ្ជួរស្រែ។ហេតុការណ៍កើតឡើងកាលពីវេលាម៉ោង៩ ព្រឹក ថ្ងៃអង្គារ ១កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែឧសភា ឆ្នាំ២០១៨ នៅចំណុចភូមិខ្វាវ ឃុំបុស្បូវ ស្រុកព្រះនេត្រព្រះ ខេត្តបន្ទាយមាន ជ័យ។
បើតាមប្រភពព័ត៌មានពីនគរបាលប៉ុស្ថិ៍រដ្ឋបាលឃុំបុស្បូវ ប្រាប់ឲ្យដឹងថា ជនរងគ្រោះដែលស្លាប់មានឈ្មោះ ឈឿន សាម៉ន អាយុ៣២ឆ្នាំជាម្ចាស់គោយន្ត ដោយឡែក អ្នករងរបួសមានឈ្មោះ វ៉ាត សាមេត អាយុ៤៧ឆ្នាំ ជាអ្នកជិតខាង ជនរងគ្រោះរស់នៅភូមិ ឃុំខាងលើ។
បើតាមប្រភពព័ត៌មានដដែលឲ្យដឹងទៀតថា មុនពេលកើតហេតុគេឃើញជនរងគ្រោះ ម្ចាស់គោយន្តបានដោះរ៉ឺម៉កគោយន្តចេញពីក្បាលគោយន្ត ដើម្បីទៅភ្ជួរស្រែនៅពេលនោះមានអ្នកជិតខាងម្នាក់បានទៅឈរមើល។ ប៉ុន្តែនៅពេល ដោះប្រលូញកន្លឹះរ៉ឺម៉កវាមិនចេញ ទើបជនរងគ្រោះក៏យកម៉ូទ័រឆាបផ្តាច់ប្រលូញកន្លឹះរ៉ឺម៉កគោយន្តដោយ បន្ទាប់មកជនរងគ្រោះក៏យកក្បាលគ្រាប់៦០មីល្លីម៉ែត្រ មិនដឹងជនរងគ្រោះរើសយកពីតំបន់ណានោះទេ ហើយយកមកដំវាយដើម្បីយកប្រលូញកន្លឹះ គោយន្តនោះចេញ ខណៈនោះក៏ស្រាប់តែផ្ទុះគ្រាប់នោះតែម្តង បណ្តាលឲ្យម្ចាស់គោយន្យស្លាប់ចំណែកអ្នកជិតខាងទៅឈរមើលទទួលរងរបួសធ្ងន់ បង្កឲ្យមានការភ្ញាក់ផ្អើលអ្នកភូមិពេញតែភូមិ។ជនរងគ្រោះក្រោយមកសាច់ញាតិដឹកបញ្ជូនយកទៅសង្រ្គោះជីវិតនៅមន្ទីរបង្អែក ស្រុកមង្គលបូរី។
ប្រភពព័ត៌មានដដេលោ្យដឹងទៀតថា ក្រោយពីកើតឡើងនូវហេតុការណ៍នោះហើយ សមត្ថកិច្ចមូលដ្ឋានក៏បានចុះទៅត្រួតពិនិត្យកន្លែងកើតហេតុ ពិនិត្យឃើញសំណល់ក្បាលគ្រាប់៦០ មីល្លីម៉ែត្រ ១គ្រាប់ ៕ សំ វិច្ឆិកា
