សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ អគារការិយាល័យទី៥ កងពល៥៣ចំនួន មួយខ្នង ត្រូវបានអគ្គីភ័យឆាបឆេះអស់ទាំងស្រុង នៅវេលាម៉ោង៧និង៣០នាទីព្រឹក ថ្ងៃពុធ ១រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែឧសភា ឆ្នាំ២០១៨ នៅចំណុចកងពល៥៣ ក្នុងភូមិកំប្រង់ ឃុំតាគ្រៃ ស្រុកកំរៀង ខេត្តបាត់ដំបង។
សមត្ថកិច្ចមូលដ្ឋាន បានឲ្យដឹងថា អគារការិយាល័យដែលឆាបឆេះនេះ មានទំហំ ៨ម៉ែត្រx២៤ម៉ត្រែ ធ្វើអំពីឈើ ប្រក់សង្ក័សី រួមទាំងខូចខាតសម្ភារះ ម៉ូតូចំនួន១គ្រឿង រថយន្តកាមរីចំនួន១គ្រឿងកុំព្យូទរ័ចំនួន២គ្រឿង ម៉ាស៊ីនព្រីនចំនួន២គ្រឿង ម៉ាស៊ីនវាស់ឈាមចំនួន១គ្រឿង ម៉ាស៊ីនបញ្ចាំងស្លាយចំនួន២គ្រឿង ធុងបាស់ អំភ្លី ម៉ិចស័រ ចំនួន១ឈុត អង្ករចំនួន២០ការុង ប្រាក់ខ្មែរចំនួន២លានរៀល ប្រាក់ដុល្លាចំនួន២០០ដុល្លារ និងសម្ភារះប្រើប្រាស់មួយចំនួនធំទៀត។
ករណីនេះដែរ រថយន្តពន្លត់អគ្គីភ័យនៃអធិការដ្ឋាននគរបាលស្រុកកំរៀង បានចេញជួយអន្តរាគមន៍បាញ់ទឹកពន្លត់អស់ទឹកជាច្រើនឡាន ទើបមិនបណ្តាលអោយឆេះរាលដាលបន្តទៅកន្លែងទៀត។ ក្រោយពេលកើតហេតុសមត្ថកិច្ចជំនាញ បានពិនិត្យនិងសាកសួរជុំវិញនៃការឆេះ គឺបណ្តាលមកពីទុស្សេខ្សែភ្លើង៕ សំ វិច្ឆិកា
