បុរសម្នាក់ស្រវឹងស្រាបើកម៉ូតូបុកឆ្កែងាប់រីឯខ្លួនឯងរងរបួសធ្ងន់

ខេត្តកំពង់ធំ៖ ម៉ោង២៣និង១០នាទី ថ្ងៃព្រហស្បតិ៍ ២រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨ មានករណីគ្រោះថ្នាក់ចរាចរណ៍ បុរសម្នាក់បើកម៉ូតូក្នុងស្ថានភាពស្រវឹង បុកឆ្កែចំពេញទំហឹងបណ្ដាលឲ្យងាប់់ឆ្កែនិងរងរបួសធ្ងន់អ្នកបើកម៉ូតូជិះម៉ូតូបុកឆ្កែ នៅចំណុចមុខផ្ទះឈ្មោះ អឹុម​ សុផល ភូមិព្រែកស្បូវ សង្កាត់អូរគន្ធរ ក្រុងស្ទឹងសែន ខេត្តកំពង់ធំ ។

សមត្ថកិច្ចបានឲ្យដឹងថា ម៉ូតូម៉ាក C125 ពណ៌ខ្មៅ ពាក់ស្លាកលេខ កំពង់ធំ 1J.9570 បើកបរដោយឈ្មោះ ភ័ក្រ ភេទប្រុស អាយុ ២៥ឆ្នាំ មានទីលំនៅភូមិពោធិ៍ខាវ ឃុំត្បូងក្រពើ ស្រុកសន្ទុក ខេត្តកំពង់ធំ បច្ចុប្បន្នស្នាក់នៅជាកម្មករក្រុមហ៊ុនទឹកអូរវ៉ាយ ស្ថិតនៅភូមិអូរគន្ធរត្បូង សង្កាត់អូរកន្ធរ ក្រុងស្ទឹងសែន ខេត្តកំពង់ធំ រងរបួសធ្ងន់ អត់មួកសុវត្ថិភាព និងងាប់សត្វឆ្កែ១ក្បាល រីឯម៉ូតូខូចខាត បែកចង្កៀងខាងមុខ ។

បច្ចុប្បន្នអ្នករងរបួសត្រូវកម្លាំងប៉ុស្តិ៍នគរបាលអូរគន្ធរ បញ្ជូនទៅសង្គ្រោះនៅមន្ទីរពេទ្យឯកជន៥១៥ កំពង់ធំ ៕ ប៊ុនរិទ្ធី