សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរស២នាក់បានរងរបួសធ្ងន់ និងស្រាលដោយសារករណីគ្រោះថ្នាក់ចរាចរណ៍គួរឲ្យរន្ធត់ រវាងម៉ូតូ២គ្រឿងបុកគ្នាពេញទំហឹង ខណៈដែលស្រវឹងស្រាជោកទាំងសងខាងបើកបរក្នុងល្បឿនលឿនខ្វះការប្រុងប្រយត្ន័បង្កការភ្ញាក់ផ្អើលដល់អ្នកភូមិទាំងយប់ ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីថ្ងៃអាទិត្យ ១២រោច ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១០ ខែមិថុនា ឆ្នាំ២០១៨ វេលាម៉ោង៧យប់ស្ថិតនៅចំណុចភូមិរោទិ៍ ឃុំញរ ស្រុកកំពង់រោទ៍ ខេត្តស្វាយរៀង ។
តាមសមត្ថកិច្ចនគរបាល ស្រុកបានឲ្យកាសែតនគរវត្តដឹងថា បុរសដែលរងរបួសបែកក្បាលហូរឈាមជោកខ្លួនរងរបួសធ្ងន់មានឈ្មោះមនប៊ុន អាយុ៣៨ឆ្នាំមុខរបរកសិករមានទីលំនៅភូមិរោទ៍ឃុំញរ ស្រុកកំពង់រោទ៍ ដោយជិះម៉ូតូម៉ាកហុងដាសេ១០០ ពណ៌ក្រហម ពាក់ស្លាកលេខ ភ្នំពេញ ១A១៥១៥ ខូចខាតយ៉ាងដំណំ ។
ចំណែកភាគីម្ខាងទៀត មានឈ្មោះឆាយ តុលា អាយុ២៧ឆ្នាំ មុខរបរបើករ៉ូឡូ ធ្វើថ្នល់មានទីលំនៅភូមិទឹកថ្លា ឃុំគីរីមានជ័យ ស្រុកបសេដ្ឋ ខេត្តកំពង់ស្ពឺ ដោយជិះម៉ូតូម៉ាកហុងដាវ៉េវ ពណ៌ទឹកមាស លាយខ្មៅ គ្មានស្លាកលេខ ។
បើតាមសាក្សីបានប្រាប់ឲ្យដឹងថា មុនកើតហេតុមានម៉ូតូម៉ាកសង់កូរ៉េធ្វើដំណើរពីកើតមកលិច ដោយអការស្រវឹងស្រា ស្រាប់តែមានម៉ូតូម្ខាងទៀតម៉ាកហុងដាវ៉េវជិះម្នាក់ឯងទំនងជាស្រវឹងស្រាដែរ ក៏បុកបញ្ច្រាសទិសគ្នាពេញទំហឹង ។
ប្រមាណជាកន្លះម៉ោងសមត្ថកិច្ចមូលដ្ឋានបានមកអន្តរាគមន៍ និងយកអ្នករងរបួសបញ្ជូនទៅព្យាបាលនៅមន្ទីរពេទ្យខេត្តស្វាយរៀង និងវាស់វែងអូសយកមធ្យោបាយម៉ូតូទាំងពីរគ្រឿងរក្សាទុកនៅប៉ុស្តិ៍នគរបាលរដ្ឋបាល ឃុំញរ ដើម្បរង់ចាំដោះស្រាយពេលក្រោយតាមច្បាប់ ៕ យឹម សុថាន
