ថៃ អតិជាតិបុត្រ បញ្ចេញបទ មនុស្សទីបី ចាក់ដោតអារម្មណ៍យុវវ័យ

ភ្នំពេញ៖ តារាចម្រៀងវ័យក្មេង ម្ចាស់បទ គ្រាស្នេហ៍ ដែលទទួលបានការគាំទ្រខ្លាំងពីយុវវ័យកន្លងមកនោះ ពេលនេះបានបញ្ចេញបទចម្រៀងOriginal Songថ្មីទី៧របស់ខ្លួនកាលពីចុងសប្តាហ៍នេះ ។ បទថ្មីនេះគឺបទ មនុស្សទីបី ដែលចេញមិនបានប៉ុន្មានម៉ោងផងក៏ទទួលបានការគាំទ្រច្រើនមិននឹកស្មានដល់ ។

ថៃ អតិជាតិបុត្រ តារាចម្រៀងប្រចាំផលិតកម្ម VCine Picture ធ្លាប់ផ្ទុះការគាំទ្រខ្លាំង លើបទចម្រៀងមួយចំនួនដែលបទចម្រៀងខ្លះមានការចូលទស្សនាមិនក្រោមជាង១០លានដងនោះទេ ។ តារាចម្រៀងវ័យក្មេងរូបនេះក៏កំពុងទទួលបានការគាំទ្របន្ថែមទៀតជាមួយនឹងស្នាដៃសិល្បៈផ្នែកចម្រៀងថ្មីជាមួយនឹងការរៀបចំខ្លួនថ្មីប្លែកខុសពីសិល្បករដទៃ ។

បទថ្មី មនុស្សទីបី ប្រកាសចេញភ្លាម មានក្រុមយុវវ័យជាច្រើនបានចាប់អារម្មណ៍ខ្លាំង ដែលអត្ថន័យនៃបទចម្រៀងនេះ​បានចាក់ចំបេះដូងអ្នកគាំទ្រ និងរឿងរ៉ាវស្នេហារបស់ពួកគេ ។ តារាចម្រៀងវ័យក្មេងរូបនេះបានបញ្ជាក់ថា លោកសប្បាយចិត្តដែលស្នាដៃបទចម្រៀងថ្មីដែលលោក និពន្ធបទភ្លេង ទំនុកច្រៀង និងច្រៀងដោយខ្លួនឯងបានចេញជារូបរាងឡើងហើយក៏ទទួលបានការចាប់អារម្មណ៍ខ្លាំងពីទស្សនិកជន ។ លោកបញ្ជាក់ថានេះគឺជាកម្លាំងចិត្តដ៏ធំ សម្រាប់លោកបន្តការប្រឹងប្រែងបន្ថែមទៀតលើការងារសិល្បៈ ។ លោកថាស្នាដៃថ្មីរបស់លោកនឹងបន្តលេចចេញជារូបរាងជាបន្តបន្ទាប់ក្នុងពលេខាងមុខផងដែរ ។

គួរបញ្ជាក់ដែរថា ថៃ អតិជាតិបុត្រ ទើបនឹងប្រឡូកក្នុងវិស័យចម្រៀងត្រឹមតែរយៈពេលជាង២ឆ្នាំប៉ុណ្ណោះ ។ សិស្សថ្នាក់ទី១០នៃវិទ្យាល័យ ELT រូបនេះ បានចុះកិច្ចសន្យាច្រៀងរយៈពេល៤ឆ្នាំ៕ វឌ្ឍនា