សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់នគរបាលប៉ុស្តិ៍អូរបែកក្អម ឃាត់ខ្លួនករណីលួចមានស្ថានទម្ងន់ទោសដោយប្រព្រឹត្តអំពើហិង្សា( ឆក់ខ្សែក) កាលពីថ្ងៃទី ២៩ ខែសីហា ឆ្នាំ២០១៨ វេលាម៉ោង ១៨ និង៣០នាទី នៅចំណុចមុខម្តុំឃ្លាំងលក់ឡាន ផ្លូវ២០០៤ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
សមត្ថកិច្ចប្រាប់ថា ជនសង្ស័យ ឈ្មោះ សុខ សង្ហា ភេទប្រុស អាយុ ២២ឆ្នាំ មុខបរមិនពិតប្រាកដ ស្នាក់នៅផ្ទះសង់ថ្មី ផ្លូវបេតុង ភូមិបុរីកីឡា សង្កាត់វាលវង់ ខណ្ឌ៧មករា (មានសារធាតុញៀន) ។
ចំណែកជនរងគ្រោះ ឈ្មោះ ហេង លីណា ភេទស្រី អាយុ ២៥ឆ្នាំ មុខរបរលក់ដូរ ស្នាក់នៅផ្ទះសង់ថ្មី ផ្លូវបេតុង ភូមិព្រៃតាខ្មៅ សង្កាត់ដើមមាន ក្រុងតាខ្មៅ ខេត្តកណ្តាល ។
ក្នុងនោះសម្ភារៈបាត់បង់មាន៖ ខ្សែកដាំត្បូង ចំនួន០១ខ្សែ មានតម្លៃ៣២០ដុល្លារ ។
សម្ភារបន្សល់ទុក ៖ ម៉ូតូចំនួន០១គ្រឿង ម៉ាកនិច ពណ៌ខ្មៅ ផលិតឆ្នាំ២០១៨ ពាក់ស្លាកលេខភ្នំពេញ 1GP-4593(របស់ជនសង្ស័យ) ។
ប្រភពឲ្យដឹងថា មុនពេលកើតហេតុ ជនរងគ្រោះ និងក្រុមគ្រួសារ បានជិះម៉ូតូចេញពីផ្ទះនៅក្រុងតាខ្មៅ ខេត្តកណ្តាល ក្នុងគោលបំណងមកផ្ទះបងប្អូននៅសង្កាត់ក្រាំងធ្នង់ ពេលជនរងគ្រោះធ្វើដំណើរជិះម៉ូតូមកដល់ចំណុចកើតហេតុស្រាប់តែជនសង្ស័យ០១នាក់ ជិះម៉ូតូ០១គ្រឿងមកជិតជនរងគ្រោះ រួចជនសង្ស័យធ្វើសកម្មភាពឆក់យកខ្សែកពីជនរងគ្រោះបាន ហើយជិះម៉ូតូគេចខ្លួន រួចជនរងគ្រោះ និងគ្រួសារបានជិះម៉ូតូដេញតាមរកឃើញជនសង្ស័យនៅម្តុំសង្កាត់ស្ទឹងមានជ័យ១ ខណ្ឌមានជ័យ បាននាំគ្នាឃាត់ខ្លួនជនសង្ស័យបានហើយ ប្រគល់ឲ្យសមត្ថកិច្ចប៉ុស្តិ៍រដ្ឋបាលអូរបែកក្អមសាកសួរ រួចជនរងគ្រោះបានដាក់ពាក្យបណ្តឹងចោទប្រកាន់ជនសង្ស័យតែម្តង ។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តនីតិវិធី ចំណែកខ្សែកដែលជនសង្ស័យឆក់បាននោះរូបគេ(ជនសង្ស័យ)បានឆ្លើយថាជ្រុះបាត់ហើយ៕ តុង សីហា
