សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់បានធ្វើសកម្មភាពឆក់ទូរស័ព្ទដៃពីជនបរទសមិនបានសម្រេច ហើយភ្លាត់ស្នៀតក៏ដួលម៉ូតូ និងភ័យពេកបាននាំគ្នារត់ចោរម៉ូតូបាត់ ។ ហេតុការណ៍នេះ បានបង្កការភ្ញាក់ផ្អើលដល់ប្រជាពលរដ្ឋកាលពីវេលាម៉ោង១០ និង៥០នាទីយប់ ថ្ងៃទី១២ ខែតុលា ឆ្នាំ២០១៨ ត្រង់ចំណុចមុខផ្សារដេប៉ូ នៅតាមបណ្ដោយផ្លូវលេខ២១៥ ស្ថិតក្នុងសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ។
យោងតាមប្រភពព័ត៌មានពីប្រជាពលរដ្ឋបានប្រាប់ឲ្យដឹងថា មុនពេលកើតហេតុ គេឃើញម៉ូតូរ៉ឺម៉កឥណ្ឌា បានដឹកភ្ញៀវជាជនជាតិបរទេសម្នាក់ បានធ្វើដំណើរតាមបណ្ដោយផ្លូវ២១៥ ទិសដៅពីជើងទៅត្បូង ខណៈមកដល់ចំណុចកើតហេតុ ក៏លេចមុខជនសង្ស័យពីរនាក់ជិះម៉ូតូមួយគ្រឿងម៉ាកស្មាក់រ៉េវ៉ូ ពណ៌ខ្មៅ ពាក់ស្លាកលេខ កំពង់ចាម 1K-6371 តាមមកពីក្រោយ ហើយធ្វើសកម្មភាពឆក់ទូរស័ព្ទរបស់ជនបរទេស តែមិនបានសម្រេច និងបានទាក់ដៃចង្កូតជាមួយម៉ូតូរ៉ឺម៉កកង់បីឥណ្ឌាបណ្ដាលឲ្យដួលម៉ូតូ ពេលនោះក៏មានការស្រែកឆោឡោពីប្រជាពលរដ្ឋ ធ្វើឲ្យជនសង្ស័យទាំងពីរភ័យ ក៏រត់គេចខ្លួនបាត់ ដោយទុកម៉ូតូនៅនឹងកន្លែងកើតហេតុ ។
ក្រោយពេលកើតហេតុ សមត្ថកិច្ចមូលដ្ឋានបានមកដល់កន្លែងកើតហេតុ ហើយយកម៉ូតូរបស់ជនសង្ស័យដែលជិះធ្វើសកម្មភាពយកទៅរក្សាទុកប៉ុស្ដិ៍នគរបាលផ្សារដេប៉ូ១ ដើម្បីស្រាវជ្រាវចាប់ខ្លួនជនសង្ស័យខាងលើ មកដាក់ទោលទៅតាមផ្លូវច្បាប់ ៕ ភារ៉ា ដង្កោ
