សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ជនសង្ស័យម្នាក់ត្រូវនគរបាលចាប់ខ្លួន បន្ទាប់ពីជនសង្ស័យ បានធ្វើសកម្មភាពយកដំបងឫស្សីស្ទាក់រួចវាយស្រ្ដីម្នាក់ ខណៈកំពុងជិះម៉ូតូ បណ្ដាលឲ្យដួល រួចយកម៉ូតូជនរងគ្រោះជិះចេញទៅបាត់ ។ ករណីលួចមានស្ថានទម្ងន់ទោសខាងលើនេះ កើតឡើងនៅវេលាម៉ោង១០និង៤៥នាទីព្រឹក ថ្ងៃទី១៥ ខែតុលា ឆ្នាំ២០១៨ ស្ថិតក្នុងភូមិធំ ឃុំក្រាំងយ៉ូវ ស្រុកស្អាង ខេត្តកណ្ដាល ។
មន្រ្ដីនគរបាលស្រុកស្អាងបានឲ្យដឹងថា ជនសង្ស័យចាប់ខ្លួនឈ្មោះ រុំ វាសនា ភេទប្រុស អាយុ២៨ឆ្នាំ ជនជាតិខ្មែរ មានទីលំនៅភូមិធំ ឃុំក្រាំងយ៉ូវ ស្រុកស្អាង ខេត្តកណ្ដាល ។ ចំណែកជនរងគ្រោះឈ្មោះ អេម លាងសែ ភេទស្រី អាយុ៣០ឆ្នាំ ជនជាតិខ្មែរ មានទីលំនៅភូមិចេក ឃុំក្រាំងយ៉ូវ ស្រុកស្អាង ខេត្តកណ្ដាល ។ ដោយឡែកវត្ថុតាងដកហូតបានមានម៉ូតូ១គ្រឿង ម៉ាកហ្វីណូ (fino) ពណ៌ស លាយក្រហម គ្មានស្លាកលេខ និងដំបងឫស្សីងាប់ទំហំប៉ុនកដៃក្មេង មានប្រវែង៥០សង្ទីម៉ែត្រ (របស់ជនសង្ស័យធ្វើសកម្មភាព) ។
ប្រភពដដែលបន្ដថា នៅវេលាម៉ោង១០ ថ្ងៃខែឆ្នាំកើតហេតុខាងលើ ស្រ្ដីរងគ្រោះបានជិះម៉ូតូដោយឌុបបងស្រី និងក្មួយប្រុសផងដែរ លុះមកដល់ចំណុចកើតហេតុ ស្រាប់តែជនសង្ស័យខាងលើ បានមកស្ទាក់ផ្លូវដោយដៃកាន់ដំបងឫស្សីប្រវែងកន្លះម៉ែត្ររួចបានគំរាមនិងវាយទៅលើស្រ្ដីរងគ្រោះ ធ្វើឲ្យស្រ្ដីរងគ្រោះដួល និងភ័យស្លន់ស្លោយ៉ាងខ្លាំង ភ្លាមនោះជនសង្ស័យបានលើកម៉ូតូរបស់ជនរងគ្រោះជិះមកទិសខាងជើងបាត់ទៅ ។ ក្រោយមកស្រ្ដីរងគ្រោះប្ដឹងសមត្ថកិច្ចនគរបាលប៉ុស្ដិ៍រដ្ឋបាលក្រាំងយ៉ូវ ដើម្បីជួយអន្ដរាគមន៍ចាន់ខ្លួនជនសង្ស័យ ។
បន្ទាប់ពីកម្លាំងនគរបាលប៉ុស្តិ៍ក្រាំងយ៉ូវទទួលបានព័ត៌មានភ្លាម ក៏សហការជាមួយកម្លាំងនគរបាលស្រុកស្អាង ធ្វើការពួនស្ទាក់រហូតចាប់ខ្លួនជនសង្ស័យខាងលើ រួចបញ្ជូនមកអធិការដ្ឋាននគរបាលស្រុកចាត់ការតាមច្បាប់ ៕ ស្អាងជ័យ
