សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ៤នាក់ ជាមុខសញ្ញាឆក់ និងជួញដូរគ្រឿងញៀន ត្រូវបានកម្លាំងកងរាជអាវុធហត្ថខណ្ឌមានជ័យ ជិះល្បាតក្នុងមូលដ្ឋានប្រទះឃើញក៏ចាប់ឃាត់ខ្លួនបាន កាលពីវេលាម៉ោង៥និង២០នាទីល្ងាចថ្ងៃពុធ ៧រោច ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៣១ ខែតុលា ឆ្នាំ២០១៨ នៅចំណុចក្រោមស្ពានអាកាសស្ទឹងមានជ័យ ភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
មន្រ្តីកងរាជអាវុធហត្ថខណ្ឌមានជ័យ បានឲ្យដឹងថា ជនសង្ស័យទាំង៤នាក់ដែលសមត្ថកិច្ចឃាត់ខ្លួនខាងលើនេះ ទី១ ឈ្មោះ មាស ពេជ្រ ភេទប្រុស អាយុ២៧ឆ្នាំ មុខរបរ ចុងភៅ ស្រុកកំណើត ភូមិទំពូង ស្រុកបាទី ខេត្តតាកែវ ; ទី២ ឈ្មោះ ស៊ុ សុធា ភេទប្រុស អាយុ២២ឆ្នាំ មុខរបរមិនពិតប្រាកដ (ជាមុខសញ្ញាចែកចាយគ្រឿងញៀន និងជាមុខសញ្ញាចោរឆក់) ; ទី៣ ឈ្មោះ សុខ ផានិត ភេទប្រុស អាយុ១៤ឆ្នាំ មុខរបរ ជាងឡាន ; និងទី៤ឈ្មោះ ប៊ុន ណារិត ភេទប្រុស អាយុ១៣ឆ្នាំ មុខរបរ នៅផ្ទះស្នាក់នៅបូរីសូនី ភូមិឫស្សី១ សង្កាត់ស្ទឹងមានជ័យទី៣ ខណ្ឌមានជ័យ អ្នកទាំង៤នាក់ស្នាក់នៅចំណុចកើតហេតុខាងលើ ។ ចំណែកវត្ថុតាងដកហូតបានរួមមាន ៖ ម្សៅក្រោមពណ៌ សថ្លា (ម៉ាកទឹកកក) ចំនួន២កញ្ចប់ ទូរស័ព្ទចំនួន១គ្រឿង និងដែកកេះចំនួន៣ ។
បច្ចុប្បន្នជនសង្ស័យទាំង៤នាក់ រួមនឹងវត្ថុតាង ត្រូវបានអាវុធហត្ថខណ្ឌមានជ័យ បញ្ជូនបន្តទៅការិយាល័យបទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ ដើម្បីបន្តនីតិវិធី៕ ស តារា
