សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់ជិះម៉ូតូលឿន មិនប្រយ័ត្ន ជ្រុលបុកម៉ូតូមួយគ្រឿងទៀត ដែលធ្វើដំណើរខាងមុខបណ្តាលឲ្យរងរបួសស្រាល ចំណែកម៉ូតូដាច់កង់ខាងមុខចេញពីគ្នាតែម្តង ។
ហេតុការណ៍នេះ បានកើតឡើងកាលពីវេលាម៉ោង៩និង៥០នាទីយប់ ថ្ងៃទី៥ ខែវិច្ឆិកា ឆ្នាំ២០១៨ នៅចំណុចមុខស្ថានីយ៍ប្រេងឥន្ធនៈកាលតិច តាមបណ្តោយផ្លូវមុនីរ៉េត ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យរាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ជិះម៉ូតូម៉ាកស៊ុយសាគី ស៊ីរ៉ូស ពណ៌ក្រហម ពាក់ស្លាកលេខ កំពង់ចាម 1F 0789 ធ្វើដំណើរតាមបណ្តោយផ្លូវមុនីរ៉េត ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ក៏បំណងបត់ឆ្វេងតែមិនទាន់បានបត់ផង ស្រាប់តែមានយុវជន២នាក់ជិះម៉ូតូម៉ាក់ហុងដា សង់ស៊េរីឆ្នាំ២០១០ ពណ៌ខ្មៅ ពាក់ស្លាកលេខព្រៃវែង 1A 6193 ធ្វើដំណើរមកពីក្រោយក្នុងល្បឿនលឿនចាប់ហ្វ្រាំងមិនទាន់ ក៏ជ្រុលបុកពីក្រោយពេញទំហឹងបណ្តាលឲ្យរងរបួសស្រាល ចំណែកម៉ូតូហុងហុងដាដាច់កង់ខាងមុខចេញពីគ្នាតែម្តង ។
ក្រោយពេលកើតហេតុភាគីទាំងសងខាងបានសម្រួលគ្នាដោយម្ចាស់ម៉ូតូស៊ីរ៉ូសចេញថ្លៃជួសជុលទាំងស្រុង ដើម្បីបញ្ចប់រឿងមិនចង់វែងឆ្ងាយ ៕ សុខាសែនជ័យ
